Azərbaycan və Rusiya gömrükçüləri və sərhədçiləri problemləri müzakirə ediblər

Dekabrın 20-də Rusiya Federasiyası və Azərbaycan Respublikasının dövlət sərhədində yerləşən “Yaraq-Qazmalar” sərhəd keçid məntəqəsinin inzibati binasında Azərbaycan-Rusiya sərhəd və gömrük xidmətlərinin nümayəndələrinin işçi görüşü keçirilib.

Görüşdə RF-nin “Yaraq-Qazmalar”, “Novo-Filya” və Azərbaycanın “Samur” və “Şirvanovka” sərhəd gömrük buraxılış məntəqələrindən (GBM) keçən sərnişinlərin və nəqliyyat vasitələrinin hərəkətində yaranan yubanmaların aradan qaldırılması üçün tədbirlərin həyata keçirilməsi ilə bağlı müzakirələr aparılıb.

Sərnişinlərin, nəqliyyat vasitələrinin və malların buraxılış məntəqələrindən keçirilməsinin vəziyyəti barədə məlumat mübadiləsinin davam etdirilməsi, sərhəd və gömrük xidmətlərində növbələşmənin buraxılış məntəqələrinin işini dayandırmadan həyata keçirilməsi, yük və sərnişin nəqliyyat vasitələrinin hərəkətindəki yubanmaların qarşısını almaq üçün bütün kateqoriyadan olan nəqliyyat vasitələrinin gündəlik buraxılmasının təmin edilməsi məqsədilə fikir mübadiləsi aparılıb.

Görüşdə GBM-də yaranan növbələrin və yubanmaların bir səbəbi kimi sərhədi keçən yük nəqliyyat vasitələrinin sənədlərindəki müəyyən çatışmazlıqların olması da qeyd edilib. Sənədlərində çatışmazlıqlar olan daşıyıcılar sərhəd keçid zolağında getdiyi istiqamətdən geri qayıtmaq məcburiyyətində qalır və bu da digər nəqliyyat vasitələrinin keçməsində yubanmalara səbəb olur.

Gömrük rəsmiləşdirməsinin sürətləndirilməsi məqsədilə internet şəbəkəsindən istifadə etməklə daşıyıcılar tərəfindən yük barədə qabaqcadan məlumat verilməsi üçün sərhəd keçid məntəqələrinin terminallarında müvafiq şəraitin yaradılması da müzakirə olunub.

Rusiya tərəfinə məlumat verilib ki, “Zuxul” və “Xan-Oba” buraxılış məntəqələrinin 2013-cü ildə müasir standartlara uyğun şəkildə əsaslı tikintisi aparılacaq. 08D