M.Zeynalova: Məişət zorakılığı ölkədə ciddi şəkil alır

Azərbaycanda məişət zorakılığı və xüsusilə də qadınlara mnünasibətdə zorakılıq ciddi xarakter alır. “Təmiz Dünya” ictimai birliyinin sədri Mehriban Zeynalova bu haqda Turan-a bildirib.

Birlik rəhbəri qadınlara münasibətdə zorakılıq hallarının ciddiləşməsinə səbəb kimi bir tərəfdən qanunvericilikdəki boşluqları, digər tərəfdən isə polisin belə faktlarla bağlı şikayətləri ciddiyə almamasını göstərib. Ötən müddət ərzində qadınlara zorakılıqlarla bağlı birliyə 900-dən çox şikayət daxil olub. Bu şikayətlər baş verən zorakılıqlarının heç də hamısını əhatə etmir. Çünki zorakılığa məruz qalan qadınların çoxu şikayət etməkdən çəkinir. Bu il evlərdə 54 qadın qətlə yetirilib. 2011-ci ildə bu rəqəm 135 qətl təşkil edirdi. Döyülmələrə gəlincə, qadınların 78%-i belə zorakılığa məruz qalırlar. 

Qətllərin əksəriyyəti namusla bağlı baş verir, əksəriyyətində qadınlar baltalanır. Bu ittihamın nə dərəcədə əsaslı olduğunu heç kəs əsaslandıra bilmir. Bu ittihama cavan qız da, 60 yaşında yaşlı qadın da məruz qalır.   

Bu zorakılıqların qarşısını almaq üçün profilaktik iş aparılmır. Evlilik həyatına daxil olan və daxil olmaq istəyən gənc oğlanların zorakılığa meylli olub-olmaması testləri keçirilmir. Halbuki VVAQ-lar nəzdində bu testi keçirməli olan psixoloq, sosioloq mütəxəssislər fəaliyyət göstərməlidir. Evlərdə zorakılığa məruz qalan qadınları müdafiə edəcək etibarlı sistem yoxdur. Polis qadınlara qarşı qətl, işgəncə, ağır xəsarətlərlə müşayət olunan cinayətlər törədildikdən sonra hadisəyə müdaxilə edir. Bu isə zorakılığın qarşısını almaq yox, baş vermiş cinayətin nəticələrini aradan qaldırmaqdır. 

M.Zeynalovaya görə, qadınlara qarşı zorakılıqların qarşısını almaq üçün cərimə həddini 3000-5000 manata qaldırmaq lazımdır. Qadına qarşı zorakılığa görə qanunvericilik sərt cəza nəzərdə tutmalıdır. Polis qadınlara qarşı baş verən zorakılıqlara münasibətdə ayrı-seçkilik mövqeyinə son qoymalıdır. -05B-