�Nardaran-2� işi üzrə məhkəmə prosesində

Bakı/21.07.17/Turan: İyulun 21-də Bakı Ağır Cinayətlər Məhkəməsində hakim Mayıl Bayramovun sədrliyi ilə"Müsəlman Birliyi" Hərəkatının sədr müavini Elçin Qasımovun və digər 11 nəfərin məhkəmə prosesi keçirilib. Prosesdə Baş Mütəşəkkil Cinayətkarlıqlarla Mübarizə İdarəsinin əməliyyat müvəkkili Əliyev Hətəm şahid qismində ifadə verib. O, Alış Vüsalın və Ramin Əliyevin tutulması əməliyyatında iştirak edib. Şahidin sözlərinə görə, A. Vüsalın üstündə kitabça, evinin yataq otağında isə qumbara aşkar olunub. A. Vüsal onun yalan ifadə verdiyini, hətta evə gətirilən hal şahidlərinin sərxoş olduğunu deyib.

Digər təqsirləndirilən şəxs R. Əliyev deyib ki, Cəlilabad rayon polis şöbəsindən zəng edib onu bölməyə çağırıblar, sonra əllərini qandallayıb evinə aparıblar. Evində heç bir otaqda axtarış etmədən atasının yataq otağına qoyduqları qumbaranı götürüblər. "Mənim kitab şkafımı qarışdırıb, sonra əlində kitabça tutub deyir ki, sənin üstündən tapdım. Sonra məni əlləri qandallı vəziyyətdə "bandotdel"ə apardılar. İdarədə Hətəm mənə dedi ki, əgər ailəni düşünürsənsə döyülüb, söyülmək istəmirsənsə dediklərimizə qol çək. Onlar imla deyirdi, mən də məcbur olub yazırdım", - Ramin Əliyev bildirib.

Sonra digər əməliyyatçı Mehman Teymurov çıxış edib. O, Əmirəli Əliyevin evində keçirilən baxışda iştirak edib. O, evdə Əmirəlidən başqa heç kim olmadığını, evdən 25 patron, 1 əl qumbarası, avtomat, kitabça çıxdığını deyib. Ə.Əliyev şahidin yalan ifadə verdiyini, evində əməliyyat aparan şəxsin o olmadığını bildirib: " Evdə 3 oğlum, bir qardaşım oğlu və yoldaşım idi. Evə 30 nəfər əli silahlı qara maskalı şəxs girdi. Onlar uşaqları tutmaq istəyəndə dedim ki, məni tutun, onları buraxın. Nəyə istəsəniz qol çəkərəm. Evdə nə kağız verdilərsə oxumadan imza atdım. Sonra bilmişəm ki, üstümə nə qədər silah, kitabça qoyublar. Əgər mən cinayətkaram idimsə evimə niyə şahid olmadan gəldilər? Niyə evimdə çəkiliş aparmadılar?"

Digər şahidlər gəlmədiyi üçün növbəti məhkəmə prosesi iyulun 28-nə təyin edilib.