«Nardaran işi» üzrə prosesdə növbəti qalmaqal

Cümə günü Ağır Cinayətlər Məhkəməsində “Nardaran işi” üzrə proses davam edib. Prosesdə bir çox şahidlər və bəzi vəkillər iştirak etməsə də, növbəti sensasiya doğuran bəyanatlar səslənib.

Turan-ın müxbirinin məhkəmə zalından verdiyi məlumata görə, “Müsəlman Birliyi” hərəkatının həbsdə olan lideri Taleh Bağırzadə və digər 16 müttəhim hakimin iclası noyabrın 23-nə keçirmək qərarına etiraz ediblər.

Sonradan müttəhim Cabbar Cabbarov söz istəyərək bildirib ki, hakimiyyət ötən il noyabrın 26-da polislə qarşıdurma zamanı həlak olmuş dörd gəncin qəbrini dağıdıb.

Daha sonra Taleh Bağırzadə Azərbaycan hakimiyyətini İŞİD-dən və vəhabilərdən fərqli olmamaqda ittiham edib.

“Qoy bilsinlər ki, bir gün onların atalarının qəbirlərini və abidələrini də belə dağıdacaqlar. Sözüm sənədir, İlham Əliyev, qəbirlərə toxunma!”, deyə o qışqırıb.

Bundan sonra hakim iclasa 14.00-a qədər fasilə verib.

* 2015-ci il noyabrın 26-da Nardaranda xüsusi əməliyyat zamanı atışma nəticəsində ikisi polis olmaqla 6 nəfər həlak olub. Bu iş üzrə əksəriyyəti “Müsəlman Birliyi” hərəkatının üzvləri və tərəfdarları olmaqla, ümumilikdə 70-ə yaxın insan məsuliyyətə cəlb olunub.Onlar CM-in bir sıra maddələri üzrə - konstitusiya quruluşunun zorla dəyişdirilməsi, mütəşəkkil silahlı cinayətkar qrup yaratmaq və s.-də ittiham olunur.

Hazırda Bakı Ağır Cinayətlər Məhkəməsində bu iş üzrə ittiham olunan 18 nəfərin işi üzrə proses gedir. Onlar arasında AXCP sədr müavini Fuad Qəhrəmanlı da var, o, dövlət əleyhinə çağırışlarda, dini ədavət salmaqda, kütləvi iğtişaşlara çağırışlarda ittiham olunur. Əslində Qəhrəmanlı öz facebook səhifəsində nardaranlıları öz hüquqlarını müdafiə etməyə çağıran müraciət yazıb. -36B-