«Nardaran işində» Abbas Hüseynov məhkəmə zalına qaytarıldı

Oktyabrın 17-də Bakı Ağır Cinayətlər Məhkəməsində "Müsəlman Birliyi"Hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və digərlərinin cinayət işi üzrə növbəti məhkəmə iclası keçirilib.

Hakim Əlövsət Abbasovun sədrlik etdiyi iclasda vəkil Nemət Kərimli çıxış edərək bildirib ki, ötən məhkəmə prosesindən sonra Abbas Hüseynov cərimə kamerasına salınıb və bu gün də prosesdə iştirakına icazə verilmir. Hakim Əlövsət Abbasov isə deyib ki, onun cərimə kamerasına salınması barədə qərar məhkəmə tərəfindən verilməyib: "Ötən prosesdə zərərçəkmiş şəxsə qarşı nalayiq hərəkətlər edildi. Bununla bağlı akt tərtib edilib. Onun cərimə kamerasına salınması bizim göstərişimizlə olmayıb. Lakin iclasda iştirakına məhkəmə tərəfindən icazə verilmir, çünki qaydaları pozub".

Taleh Bağırzadə isə deyib ki, əgər Abbas Hüseynov iclasda iştirak etməsə prosesin keçirilməsinə imkan verməyəcəklər. Vəkil Yalçın İmanov bildirib ki,  Abbas Hüseynov prosesdə iştirak etmək və məsələyə aydınlıq gətirmək istəyir. Hakim isə  “bundan əvvəl də Abbas Hüseynov qaydaları pozub, sonra belə hərəkət etməyəcəyinə söz verib”-deyə, Ə.Abbasov bildirdi.

Bundan sonra Taleh Bağırzadənin "Bu rejim zalım rejimdir və siz də onun tərkib hissəsiniz. Ona görə bu rejim getməlidir" sözlərindən sonra təqsirləndirilən şəxslər iclasda "İstefa", "Azadlıq", “Şah getməlidir” kimi şüarlar səsləndiriblər. Məhkəmədə 5 dəqiqəlik fasilə elan edilib.

Fasilə zamanı çıxış edən Fuad Qəhrəmanlı deyib ki, onların məhkəməsi sırf siyasi məsələdir: "Biz məhkəmədən ədalət gözləmirik, gözləmək də lazım deyil. Biz cəmiyyətə mesaj göndəririk ki,  hakimiyyət onlara qarşı çıxanlara necə təzyiq edir. Heç kim bu hakimiyyətdən mərhəmət gözləməsin. Cəmiyyətdə narazılıq getdikcə artır. Əvvəl-axır bu hakimiyyət gedəcək. İndiyə kimi siyasətə qarışmayan adamlar meydana çıxacacaq, öz haqqlarını tələb edəcəklər. Evdə oturmaqla, çayxanada qeybət etməklə bu hakimiyyətin getməsinə nail olmaq olmaz. İnsanları fədakarlığa hazırlamaq lazımdır. 2-3 faiz adam meydanlara çıxsa vəziyyət dəyişəcək. Azərbaycan hakimiyyəti siyasi məhbus məsələsini alverə çevirib. Sabah bizi buraxıb, başqasını tutacaqlar. Onlar başa düşməlidirlər ki, bir nəfəri tutduqda beşi ayağa qalxır. Nə pislik istəyirlər etsinlər, bizim qorxumuz yoxdur. Gücü canlı təbliğata vermək lazımdır. Facebook sosial şəbəkəsində bir milyondan çox adam var. Onların fikrini dəyişsək çox şey dəyişər. Aksiyalara daha çox adam getməlidir. Xalqın fikrini dəyişmək bir partiyanın,təşkilatın işi deyil. Hakimiyyət anlamalıdır ki, tutmaqla, həbslə narazılığın qarşısını almaq olmaz. Bizi çox görsələr vahimələnəcəklər. Biz istəyirik hər şey dinc yolla baş versin. Biz bu gün Azərbaycan xalqının düşmənləri ilə üz-üzəyik. Düşməndən mərhəmət gözləmək olmaz ".

Fasilədən sonra hakim gəldi və təqsirləndirilən şəxslər Abbasın gəlmədiyini gördükdə yenidən şüarlar səsləndirdilər. Yenidən fasilə elan olundu.

Fasilədən sonra Taleh Bağırzadə çıxış edərək bildirib ki, Abbas Hüseynova qarşı haqsızlıq olub: ”Siz bizi dinləyib sonra qərar verməli idiniz. Ötən iclasda baş verənlərdən sonra Abbas “kars”a salınıb. Bu gün onun ikinci dəfə cəzalandırılaraq iclasa buraxılması düzgün deyil. Bizə təhdiq xarakterli mesajlar göndərirsiniz. Istəyirsiniz prosesi ayda bir dəfə keçirdin, bizə dəxli yoxdur. Biz onun iştirakını isəyirik”. Hakim isə deyib ki, Abbas hüseynov məhkəməyə müraciət etdiyi təqdirdə baxılacaq: “Biz də istəyirik ki, proses davam etsin”.

Taleh Bağırzadə isə deyib ki, prosesin sonunda veriləcək qərarı çoxdan bilirlər: “Biz ona görə sizə deyirdik ki, bu işdən uzaqlaşın. Çünki bu siyasi işdir və burada sizin də adınız var. Biz nə  sizin rəhbərlikdən , nə də sizdən qorxmuruq.Xəbər göndərirsiniz ki, prosesi təcridxanada keçirəcəksiniz. Harada istəyirsiniz keçirin. Bizi Kürdəxanı təcridxanası ilə qorxudursunuz? O, şərəfsiz (zərərçəkmiş İbrahim Kazımovu nəzərdə tutur) bizə işgəncə verib. Ona gül atası deyildik. Siz diktatura məntiqi ilə çıxış edirsiniz. Mən ölərəm sizin yerinizdə oturmaram. Siz burada işləyirsiniz. Rüşvətdən uzaq olun, insanları günahsız yerə cəza ilə yükləməyin. Sizə yuxarıdan sifariş gəlib, ya nədirsə bilmirik nə etmək istəyirsiniz. Siz söz versəniz də verməsəniz də danışacam. Sizin rəhbəriniz İlham Əliyev bizə söz verməmişdi ki? Biz sözümüzü hər zaman demişik”.

Təqsirləndirilən Cabbar Cabbarov isə deyib ki, “Şrek ” ləqəbli İbrahim Kazımov Mehriban Əliyevanı təhqir edib: “Mən proses başlayandan deyirəm ki, o, Mehriban Əliyevanı söyüb. Niyə ona irad tutmadınız?”.

Daha sonra iclasda hazırda həbsdə olan Nardaran sakinləri şahid qismində məhkəmədə ifadə veriblər.

Hazırda həbsdə olan Nadir Qədirov  heç nədən xəbəri olmadığını bildirib.: “Mən İlhamçı, Mehribançı adamam. Burada nə gəzirəm bilmirəm. Mənə işgəncə verilməyib, lakin nəyə deyiblər qol çəkmişəm. Çünki döyüləsi yaşda deyiləm. Mənə axırda deyiblər Talehin üzünə dur. Mən bunu etmədim. Dedim 20 il də iş versəniz etmərəm. Mən həbs olunandan sonra anamın ağlı başından gedib. Bunu heç vaxt bağışlamayacam. İstintaq zamanı verdiyim ifadələri təsdiq etmirəm”.

Hazırda həbsdə olan digər  Nardaran sakini Əliağa Qasımov da istintaq zamanı məcbur qalıb ifadəni imzaladığını deyib: “Ağac acı, can şirin olar. Məcbur qalıb imzalamışam.  Mənim nə ov tüfəngim, nə gülləm olub. Bir əl ağacım olub. Kürəkənimi də tutub 10 il iş veriblər. Neçə ailəni başsız qoydular. Günahsız müsəlmanlara niyə belə zülm edirlər? Allah şahiddir ki, biz heç vaxt hakimlik iddiasında olmamışıq. Evdən çıxanda balalarım ağladı. Bunu onlara bağışlamıram. Mən latın əlifbasını bilmirəm. Çox kağıza qol çəkmişəm, amma nə yazıldığını bilmirəm.Istintaq zamanı verdiyim ifadəni təsdiq etmirəm”.

Daha sonra məhkəmədə vəkil Nemət Kərimli Abbas Hüseynovun iştirakının təmin edilməsini istəyib. Məhkəmədə onun iştirakı təmin edilib.  Hakim  ona bir daha xəbərdarlıq edib. A. Hüseynov isə deyib ki, ötən iclas zamanı olanların günahkarı “Bandotdel”in yalan ifadə verən banditləridir.  

Şahid, hazırda həbsdə olan Raci Babayev də istintaq zamanı təzyiqə məruz qaldığını, həmin vaxt verdiyi ifadələri təsdiq etmədiyini deyib: “Məni məcbur ediblər qol çəkmişəm.Yataq döşəyimə qumbara qoyub, sonra çıxarıblar. Niyə namaz qılırsan, niyə nardaranlısan deyib, beş gün bondadtdeldə  işgəncə verirdilər”.

Daha sonra həbsdə olan Hüseyn Nəbizadə evində axtarış aparıldığı zaman evdə olmadığını, daha sonra bölməyə gedib evində nəyə görə qanunsuz axtarış aparıblar dedikdən sonra elə ordaca həbs ediblər.

Nardaran sakini olan şahid Ağasəlim Cəbrayılov da istintaq zamanı təzyiqə məruz qaldığını deyib: “13 yaşlı uşağımın döşəyinin altına qumbara qoyublar. Sonra da artislik edirdilər ki, “əl dəymə partlayar”. Necə şərəfiz insanlardılar. Qız uşağının döşəyinin altına bir ovuc güllə qoymuşdular. İşgəncələr altında qol çəkmişəm. Özbaşına hansı axmaq 14 ilə qol çəkər?.Məcbur elədilər, istədikləri ifadələri imzaladım”.

Prokuror ondan məruz qaldığı təzyiqlərə bağlı harasa şikayət edib etməməsini soruşub. O, “Allaha şikayət etmişəm. Burada şikayət eşidən var?” cavabını verib.

Vəkillər ondan işgəncələr haqqında ətraflı danışmasını istəyiblər. Lakin o, danışmaq istəməyib: “Mənim 52 yaşım var. Camaatın qarşısında danışmaq istəmirəm. Evimə bomba qoyub, sonra da deyirlər bunu kim verib denən”.

Nardaran sakini olan Zahid Zəkiyev də şahid qismində ifadə verib. O, da Nardaran hadisələrindən sonra həbs edilib. Z. Zəkiyev istintaq zamanı işgəncəyə məruz qaldığını deyib: “İmkan varsa açım ayaq barmaqlarımı göstərim. Dırnaqlarımı kəlbətinlə çıxarıblar. Kərim Əlimərdanov mənə işgəncə verib. Lakin dırnaqlarımı çıxaranın üzündə maska olduğundan, üzünü görməmişəm. 14 gün bondatdel işgəncə veriblər. 50 nəfər it kimi düşürdü üstümə. 26 noyabrda atəş səsi eşidib gəldim həmin evin qarşına . Bəlkə 150 nəfər polis tökülmüşdü oraya. Hicablı qadını qolundan tutub sürüyüb atdılar bayıra. Qadınların səsi gəlirdi. Bizə dedilər yaxınlaşsanız vuracağıq. Əməliyyata üzərində Elit Mebel yazılan maşınlarla gəlmişdilər. Yolda maşını necə sürmüşdülərsə bir qadını vurub atmışdılar yolun kənarına. Mən bondatdelə çatana kimi bilmirdim evimdən nə çıxardıblar”.

Vəkil Yalçın İmanov ondan barmaqlarını göstərməyi istəsə də, hakim deyib ki, eksperiment keçirmək lazım deyil.

Proses oktyabrın 19-da davam edəcək. -36С--