Nazir müavini: "Yer kürəsinin iqlimi son dərəcə sürətlə dəyişə bilər"

Bakı/18.10.23/Turan: Ümumdünya Meteorologiya Təşkilatının məlumatına əsasən bütün instrumental müşahidələr üzrə ən yüksək qlobal temperatur 2023-cü ilin iyulunda  qeydə alınıb. Bu barədə ekologiya və təbii sərvətlər nazirinin müavini Umayra Tağıyeva bildirib. 

Qlobal göstəricilər haqqında məlumatlar bütün ölkələrə şamil edilmir, çünki bu ümumi tendensiyanı göstərən ortalama bir rəqəmdir.

Onun sözlərinə görə, göstəricilər müxtəlif ölkələrdə bir-birindən xeyli fərqli ola bilər. Belə ki, 2023-cü ilin yay fəslində Azərbaycan ərazisində temperatur üzrə rekord göstəricilər qeydə alınmayıb. Amma lokal leysan yağışları nəticəsində sel-daşqın hadisələri 2022-ci ilin rekordunu 3 dəfə üstələyərək 147-yə çatıb.

Bəzən bir-birinə zidd anomal hadisələrin baş verdiyi  müşahidə olunur. Bu il Azərbaycanda bəzi çaylarda su axını azalıb, aran ərazilərdə quraqlıq baş verib.  Bu, iqlim dəyişmələrinin gözlənilməz və təzadlı tərəfləridir, Tağıyeva qeyd edib.

Monitorinq və elmi araşdırmaların nəticələrinə əsasən Birləşmiş Millətlər Təşkilatının iqlim dəyişikliyi üzrə hökumətlərarası ekspert qrupu (66 ölkədən 234 alim üzvü var) 2023-cü ildə Yer kürəsinin iqliminin son dərəcə sürətlə dəyişəcəyi qənaətinə gəlib.-0-