Nazirlər Kabinetinin təmir etdirmək istədiyi yataqxana uçub-sökülür

80 ailənin yaşadığı Hacı Zeynalabdin Tağıyev kombinatına məxsus 4 saylı yataqxana uçulub-sökülməkdə davam edir. Bu haqda Turan-a yataqxana sakini Hafiz Xanquliyev bildirib.

Onun sözlərinə görə, 5 mərtəbəli yataqxananın 2-3-cü mərtəbələri arasında fasadının mərkəzi hissəsində uzunluğu 3-4 metr, eni 1-2 metr olan hissə sentyabrın 11-də sökülərək yerə tökülüb. “Buna baxmayaraq, hələ də 80 ailə bu qəzalı yataqxanada yaşayır və mənzillə təmin olunmurlar”, - deyə H.Xanquliyev nəzərə çatdırıb. Onun sözlərinə görə, təqribən bir öncə yataqxananın yuxarı mərtəbəsində bir mənzilin mətbəxi də çöküb. 

Adı çəkilən yataqxana 2000-ci il Bakı zəlzələsindən sonra qəzalı hala düşüb. Bu haqda sakinlər dəfələrlə Bakı şəhər icra hakimiyyətinə müraciət ediblər. Nəhayət, 2004-cü ildə Nazirlər Kabinetinin qərarı ilə yataqxana sakinləri üçün bina tikilməsinə razılıq verilib. “Oğuz” tikinti şirkətinin 2008-ci ildə başladığı tikinti 2012-ci ilin mayında başa çatıb. Hər biri 18 mərtəbədən ibarət 432 mənzillik iki bina tikilib. Amma yataqxanada yaşayan 160 ailədən 80 ailəyə mənzil verilib. Qalan 80 ailəyə isə aldatma yolu ilə mənzildən imtina, yataqxanada yaşamaq istəmək kimi sənədə qol çəkdiriblər. Bununla bağlı sakinlər bu il sentyabrın əvvəlində mətbuat konfransı keçiriblər.

Bundan sonra Nazirlər Kabineti baş nazirin müavini Abid Şərifovun imzası ilə yataqxananın təmir olunması haqda sənəd hazırlayıb. Baxmayaraq ki, Fövqəladə Hallar Nazirliyi yataqxananın qəzalı olması haqda Nazilər Kabinetinə arayış göndərib, amma bu sənəd nəzərə alınmayıb. Eynilə belə məzmunlu sənədi NK-nə Bakı şəhər icra hakimiyyəti də təqdim edib.   

“Fövqəladə Hallar Nazirliyi bu yataqxananın təmir-bərpa işlərinin yeni bina tikməkdən baha başa gələcəyini bildirsə də, NK geri çəkilmək istəmir. Biz sakinlər bu uçulub-sökülən binanın nəyinin təmir ediləcəyini anlaya bilmirik?”, - deyə H.Xanquliyev qeyd edib. -05B-