Nəsimi və Nərimanov rayon hakimiyyətləri vətəndaş forumuna məhəl qoymur

Cümə günü “Vətəndaş iştirakı və seçki orqanlarının hesabatlılığı” proqramı çərçivəsində keçirilən vətəndaş forumu vətəndaşların və yerli hakimiyyət orqanlarının qarşılıqlı münasibətlərinə həsr olunub.

Layihə Seçkilərin Monitorinqi və Demokratiyanın Tədrisi Mərkəzi (SMDT) tərəfindən Avropa Komissiyası və ABŞ-ın Milli Demokratiya İnstitutunun dəstəyi ilə həyata keçirilir.

Proqramın məqsədi dövlət orqanlarının qəbul etdikləri qərarlarda vətəndaşların iştirakının artırılmasına yardım etməkdir.

“Demokratik dövlətlərdə yerli və milli səviyyədə qərarların qəbulunda vətəndaşların iştirakına böyük rol ayrılır”, deyə SMDT-nin regional meneceri Cavid Nəbiyev bildirib.

Onun sözlərinə görə, layihə çərçivəsində artıq 10 regionda vətəndaşları hüquqi cəhətdən maarifləndirilməsinə, bələdiyyə və dövlət orqanlarına müraciətlər hazırlanmasının öyrədilməsinə, kollektiv qərarlar irəli sürülməsinə həsr olunmuş vətəndaş forumları və seminarlar keçirilib.

Bugünki forum paytaxtın Nəsimi və Nərimanov rayonlarında vətəndaşların yerli hakimiyyətlərlə qarşılıqlı münasibətlərinə həsr olunub. Lakin Nəsimi rayonunun yerli hakimiyyət qurumlarından heç kim tədbirə gəlməyib, Nəsimi rayonundan isə yalnız bələdiyyənin bir nümayəndəsi – Nailə İsmayılova gəlib. Amma o da görüşün əvvəlində vətəndaşların hüquqları haqqında məruzəni mənfi qarşılayıb, bunun hamıya məlum olduğunu bildirib. Bu irad zalda narazılığa səbəb olub. “Bu məntiqlə məktəblərə və universitetlərə də getməyə ehtiyac yoxdur, çünki dərsliklərdə hər şey yazılıb”, deyə görüş iştirakçılarından biri istehza edib.

Daha sonra Nərimanov rayon sakini Vüqar Abbasov bildirib ki, Xoyski küçəsində onların məhəlləsində əhalinin problemləri həll olunmur – isitmə sistemi yoxdur, zibil yığılmır, digər kommunal xidmətlərdə fasilələr olur. “Biz dəfələrlə rayon icra hakimiyyətinə, bələdiyyəyə, deputatımız Adil Əliyevə müraciət etmişik, amma heç bir tədbir görülmür”, deyə Abbasov bildirib.

Nərimanov rayonunun digər sakini zibil yığılmadığı üçün qalaq-qalaq olmasından şikayət edib. Görüş iştirakçılarından birinin bu sakinə seçkilərdə iştirak edib-etməməsi və kimə səs verməsi barədə sualı onun qəzəbinə səbəb olub. Bundan sonra bir neçə “fəal” vətəndaş, eyni zamanda Nəsimi rayon bələdiyyəsinin nümayəndəsi zalı tərk edib.

SMDT-nin icraçı direktoru Bəşir Süleymanlı bildirib ki, bütün regionlarda bələdiyyə və hakimiyyət nümayəndələri də eyni şəkildə davranır. “Bu, qəsdən edilir, belə ki, onlar vətəndaşların öz hüquqlarını bilməsini istəmirlər”, deyə Süleymanlı qeyd edib. Daha sonra forum daha sakit, konstruktiv atmosferdə keçirilib və görüş iştirakçılarına vətəndaşların dövlət qərarlarının qəbul edilməsində iştirakı: seçkilərdə seçici, namizəd, seçki komissiyasının üzvü, müşahidəçi qismində iştirak, təşəbbüslər irəli sürülməsi, məhəllə komitələrinin yaradılması, ərizələrin verilməsi, yerli sorğuların keçirilməsi, imza toplanması, qanunverici təşəbbüslərin irəli sürülməsi haqqında təcrübi məlumatlar təqdim edilib.  -06C-