Nikah sayı artır, boşanma isə yerində “sayır”

Bakı/27.04.22/Turan: 2022-ci ilin əvvəlindən ölkə əhalisinin sayı 8098 nəfər və ya 0,07 faiz artaraq mart ayının 1-nə 10164464 nəfərə çatıb, bir kvadrat kilometrə düşən əhali sayı 117 nəfər olub. Bu barədə Dövlət Statistika Komitəsinin yaydığı məlumatda deyilir.

Əhalinin 52,9 faizini şəhər, 47,1 faizini kənd sakinləri təşkil edib, kişilərlə qadınların xüsusi çəkisi isə eyni olub, orta hesabla hər 1000 kişiyə 1001 qadın düşür.

Ədliyyə Nazirliyinin rayon (şəhər) qeydiyyat şöbələri tərəfindən cari ilin ilk iki ayı ərzində ölkədə 20462 doğulmuş körpə qeydə alınıb, doğulanların 53,3 faizi oğlan, 46,7 faizi isə qız uşaqlarıdır.

Ədliyyə Nazirliyinin məlumatına görə, bu ilin yanvar-fevral aylarında 9606 nikah və 2505 boşanma halları qeydə alınıb. Ötən ilin müvafiq dövrü ilə müqayisədə əhalinin hər 1000 nəfərinə nikahların sayı 3,5-dən 5,9-a qədər artıb, boşanmaların sayı isə dəyişməyərək eyni səviyyədə qalıb. -05D-