O.Gündüz: Mərkəzin Əsasnaməsi ictimaiyyətin iştirakı ilə hazırlanmalıdır

“Multimedia” ictimai birliyinin rəhbəri Osman Gündüz cümə günü “RİA-Novosti” agentliyində ölkədə informasiya təhlükəsizliyinə dair mətbuat konfransı keçirib. 

O.Gündüz bu il sentyabrın 26-da dövlət başçısı İlham Əliyevin ölkədə informasiya təhlükəsizliyinin təkmilləşdirilməsilə bağlı sərəncam imzalamasını yada salıb. Buna qədər isə dövlət qurumları saytlarının bir mərkəzdə toplanması, dövlət qurumlarının internet resurslarına verilən tələblərlə bağlı imzalanan sərəncamlar qeyd edilib. İnformasiya təhlükəsizliyilə bağlı yaradılan agentlik bu sərəncamların zirvəsi sayılıb. 

O.Gündüz bu sənədlərin varlığını hökumətin bu sahəyə ciddi şəkildə yanaşmasının göstəricisi adlandırıb. Agentlik dövlət qurumlarının internet resurslarının monitorinqini aparır, texniki dəstək verir və kadr hazırlığı ilə məşğul olur. Eyni zamanda, bu məqsədlə dövlət büdcəsində vəsait nəzərdə tutulur ki, indiyə kimi büdcədə belə vəsait nəzərdə tutulmurdu. O.Gündüz bu addımları dövlət qurumlarının informasiya təhlükəsizliyi sahəsində hüquqi-normativ və infrastruktur baxımından boşluqların tam aradan qaldırılması kimi dəyərləndirib.      

Qeyri-dövlət internet resurslarının təhlükəsizliyi isə Rabitə Nazirliyinin tərkibində yaradılan İnformasiya Təhlükəsizliyi Mərkəzinə həvalə edilir. Mərkəzin qeyri-dövlət qurumlarının internet resurslarına informasiya təminatı, metodiki dəstək, texniki dəstək verməsi istiqamətində fəaliyyət göstərməsi nəzərdə tutulur. 

O.Gündüz Mərkəzin səmərəli fəaliyyəti üçün Əsasnaməsinin yaradılmasının vacibliyinə diqqət çəkib. Həm də bu Əsasnamənin vətəndaş cəmiyyəti institutları təmsilçilərinin geniş iştirakı ilə hazırlanmasının zəruriliyini vurğulayıb. -05B-