Ölkə mediası nə yazır?-media-icmal 28.12.20

Koronavirusdan qorunma üsulları, apteklərdə bəzi dərmanların qıtlığı, Rusiya sülhməramlılarının fəaliyyətinə münasibət,  Rusiya-Ermənistan  əlaqələrinə baxış, tikinti sektorunda Azərbaycan brendinin yaradılması qayğıları və s. məsələlər medianın apaırıcı mövzuları sırasındadır. 

“Azərbaycan” qəzeti  “Koronavirusdan xilas yolları mümkündür” sərlövhəli məqalədə koronavirus  infeksiyasından qorunma üsulları barədə danışılır.

Müəllifin deməsinə görə, virusa yoluxan insanların çoxu sağalır, bunun üçün əsas şərtlər kimi vaxt itirmədən həkimə müraciət edilməli, koronavirusa yoluxmanın qarşısı alınmalı, soyuqdan qorunmalı, qabaqlayıcı tədbirlərə, sanitar, dezinfeksiya qaydalarına riayət olunmalıdır.   Müəllifin fikrincə, bu sahədə riskləri, özünümüdafiə və profilaktikanı unutmaq olmaz.

Azərbaycanda koronavirus infeksiyası ilə bağlı duruma toxunan müəllif deyir ki, indiyədək 200 min nəfərdən çox insan koronavirusa yoluxub, 160 mindən çox şəxs sağalıb, 2 mindən çox vətəndaş vəfat edib, aktiv xəstə sayı 45 min nəfərdən çoxdur.

Müəllif həkimlərə istinadən deyir ki, virusa yoluxan şəxslər sağaldıqdan sonra belə onlarda postkovid sindromu olaraq zəif konsentrasiya, yaddaş, yuxusuzluq, depressiya, ürək və ağciyər, həzm sistemi, başağrısı və s. problemlər qalmış olur.

Müəllif  vurğulayır ki, orqanizmi qoruyan əsasən immun sistemidir, bu sistemdə ahəng pozulduqda orqanizmin müqaviməti qırılır, həmin xəstəlik qarşısında aciz qalır və məhv olur. Odur ki, immun sistemin güclü qalması üçün hər kəs özünü qorumalıdır.

“Redaktor.az” saytı ”Bəzi dərmanların qiyməti bahalaşıb-Nazirlikdən açıqlama” sərlövhəli məqalədə bu bahalaşmanın səbəbləri axtarılır.

“Koronavirus pandemiyası ilə əlaqədar dünyada olduğu kimi, ölkəmizdə də bir sıra dərman vasitələrinə tələbat artıb. Bu səbəbdən dərman vasitələrinin təsdiq edilmiş qiymətdən fərqli qiymətə satışı və əsassız dövriyyədən çıxarılmaqla dərman qıtlığı yaradılmasına çalışan işbazlar var. Məsələn, iddiaya görə, 6 manata olan kleksanı “qara bazar”da 60 manata, 40 manata olan favir-piraviri isə 500 manata satırlar” deyə müəlif konkret nümunələr göstərir.

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətindən isə bildiriblər ki, süni qiymət artımının qarşısını almaq üçün xidmət monitorinqləri gücləndirib.

Xidmət bildirib ki, mövcud qanunvericiliyə əsasən dövlət qeydiyyatına alınan dərman vasitələrinin qiymətlərinin tənzimlənməsi Tarif (qiymət) Şurası tərəfindən həyata keçirilir və indiyə kimi Tarif (qiymət) Şurası tərəfindən 12.114 dərman vasitəsinin qiyməti təsdiq edilib.

Dövlət qeydiyyatından keçən dərman vasitələrinin təsdiq edilmiş qiymətdən fərqli qiymətə satışı qadağandır və bu hallara görə məsuliyyət tədbirləri nəzərdə tutulur. Xidmətdən həmçinin o da bildirilib ki, aparılan monitorinqlər zamanı qanun pozuntusu halları aşkar edildiyi təqdirdə qanunvericilikdə nəzərdə tutulmuş ciddi məsuliyyət tədbirləri görüləcək.

“Yenisabah.az” saytı “Xankəndidəki 250 rus hərbçisi kimi kimdən qoruyur?” sərlövhəli məqalədə Rusiya sülhmərmalı missiyasının Qarabağda  fəaliyyətinə münasibət ifadə edilir.

Müəllif deyir ki, Rusiya sülhməramlılarının mühəndis birləşmələri Qarabağın ermənilər yaşayan ərazilərində, xüsusilə Xankəndi ətrafında mina axtarmaq işini davam etdirirlər, son məlumata görə, 280 hektardan çox ərazi minalardan təmizlənib və 9 mindən çox partlayıcı qurğu zərərsizləşdirib.

Müəllif  deyir ki, Xankəndi ətrafının minalardan təmizlənməsi xəbərləri diqqət çəkir.Çünki 29 ilə yaxındır ki, Xankəndi və ətraf rayonlar erməni işğalı altında olub və şəhərin ətrafının minalanması suallar doğurur. Azərbaycan tərəf bu əraziləri minalaya bilməzdi.

Müəllifə görə, Xankəndini ermənilər özləri Şuşa işğaldan azad edildikdən sonra minalayıblar: “Ya da mina yoxdur, sadəcə, Rusiya sülhməramlıları bölgədə iş apardıqlarını göstərmək, ermənilərə xidmət etdiklərini nümayiş etdirmək üçün “axtarış” həyata keçirirlər” deyə sülhmərmalıarın fəaliyyətinə qiymət verir. 

Müəllif vurğulayır ki, Xankəndidə 250 nəfər sülhməramlı yerləşdirlib, blok-modul şəhərciyin tikintisi başa çatıb.

Müəllif bunu da yada salır ki, Xankəndidə Azərbaycanın dövlət bayrağı qaldırılmayıb, orada Rusiyanın, Ermənistanın bayrağı var, separatçı rejimin bayrağı asılıb, bu isə çox şeydən xəbər verir. Odur ki, təbii olaraq sual yaranır, qərargahı Xankəndidə yerləşən Rusiya sülhməramlıları kimi kimdən qoruyur”.  

“Moderator.az”  saytı “Rusiya müharibədəki mövqeyi ilə Ermənistana başa saldı ki, mənsiz heç nəsən” sərlövhəli məqalədə Ermənistan-Rusiya münasibətlərini dəyərləndirir.

Müəllifin deməsinə görə, Azərbaycanın Ermənistan üzərindəki 8 noyabr zəfərindən sonra məğlub ölkədə Rusiya ilə münasibətlərin sabahına iki fərqli baxış yaranıb. Onun fikrincə, bəzi erməni siyasiləri Rusiya ilə yolları ayırmaq təklifi ilə çıxış etsə də Moskva ilə əməkdaşlığı genişləndirmək tərəfdarları da az deyil.

Keçmiş diplomat, politoloq Fikrət Sadıqov isə deyir ki, Paşinyan hakimiyyəti Qərbyönlü  siyasət yürütməyə cəhd etdi, bununla bağlı bəyanatlar verdi. Onun fikrincə, heç bir hökumət Ermənistan hakimiyyətini ciddi qəbul etmədi: “Rusiya bunu müşahidə edərək Vətən Müharibəsi zamanı Ermənistana sübut etdi ki, sən mənsiz heç nəsən. Paşinyan yəqin ki, bunu başa düşdü. Düşməyibsə də yəqin ki, başa düşmək ərəfəsindədir”, - keçmiş diplomat bildirir.

Diplomata görə, Ermənistan Rusiyanın forpostu qalmağa məhkumdur,  Rusiyadan, onun maraq dairəsindən kənara çıxa bilməz. Rusiya Vətən Müharibəsində tutduğu mövqe ilə Ermənistanı başa saldı ki, Rusiyasız bu ölkə heç nədir və Rusiyaya arxa çevirmək Ermənistanın fəlakəti ilə nəticələnər”.

“Metbuat.az”  saytı “Tikinti sektorunda 'Qarabağ brendi -ekspertdən təklif sərlövhəli məqalədə  tikinti sahəsində Azərbaycan brendinin yaradılmasından bəhs edilir.

Müəllif deyir ki, son dövrdə ölkədə tikinti nə qədər inkişaf etsə də Azərbaycan brendinin yaradılması yada düşməyib. Əvəzində isə müəllif yada salır ki, bəzi binalar “xruşşovka”, “stalinka”, “fransız”,“alman”, “moskva”, “leninqrad” adları daşıyır: “Nəticədə istənilən binaya verilmiş hər hansı şəhərin və ya şəxsin adını çəkməklə, adları daima yaşadılır. Ölkəmizdə tikinti sahəsinin bu qədər inkişaf etməsinə baxmayaraq, bu günə qədər Azərbaycanın milli memarlığını özündə və ya adında əks etdirən layihələrimizin tikilib ərsəyə gətirilməməsi təəssüf doğurur” deyə müəllif münasibət ifadə edir.

Əmlak sahəsi üzrə ekspert Elnur Fərzəliyev də hesab edir ki, bu gün tikinti sektorunda Azərbaycan brendli memarlıq üslubunu özündə əks etdirən tikililərin aparılmasına böyük ehtiyac var və yaxşı olardı ki, işğaldan azad olunmuş ərazilərdə Qarabağ və Azərbaycan layihəli binalar tikilsin.

Ekspert bundan irəli gələrək Qarabağda başlanacaq kütləvi tikintilərdə  “Azərbaycan” və ya “Qarabağ” adlı layihələr hazırlamağı irəli sürür. Onun fikrincə, tikinti sektorunda yeni Azərbaycan brendi yaradaraq milli memarlıq ornamentləri ilə layihələr hazırlanarsa və bunun üzərindən tikinti işləri aparılarsa, yeni brend yaratmaq olar.