Penitensiar Xidmət iki məhbusun qaçmasını təsdiq edib (YENİLƏNİB)

Bakı/23.10.17/Turan: Oktyabrın 23-də Bakı- Astara - Bakı planlı dəmir yolu qarovulu ilə xüsusi təyinatlı vaqonda Bakı şəhərinə müşayiət olunan 1980-ci il təvəllüdlü, əvvəllər məhkum edilmiş, hazırda Cinayət Məcəlləsinin müxtəlif maddələri ilə təqsirləndirilən Etibar Ələkbər oğlu Məmmədov və 1989-cu il təvəllüdlü, əvvəllər məhkum olunmamış, Cinayət Məcəlləsinin müxtəlif maddələri ilə təqsirləndirilən Əli Rasim oğlu Ağami müşayiət altından qaçıb.

Bu barədə Ədliyyə Nazirliyi Penitensiar Xidməti məlumat yayıb.

Məlumatda deyilir ki, Daxili İşlər Nazirliyinin ərazi polis orqanlarına təqsirləndirilən şəxslər E.Məmmədov və Ə. Ağami barəsində müvafiq məlumatlar təqdim edilib.

Faktla bağlı Azərbaycan Baş Prokurorluğunun Ağır Cinayətlərə Dair İşlər üzrə İstintaq İdarəsi tərəfindən cinayət işi başlanıb, istintaq aparılır.

Axtarış tədbirləri davam etdirilir.-03D-

* * *

2017 Oktyab 23 (Bazar ertəsi) 12:28:38

İki məhbus qaçıb

Bakı/23.10.17/Turan: Bu gecə Bakıdan Şirvana qatarla aparılan iki məhbus Biləcəri stansiyasında qaçıb. Polis hazırda qaçan məhbusların axtarışı ilə məşğuldur.

Hüquq- mühafizə orqanlarındakı mənbələr narkotik vasitələrin satışı ilə məşğul olmaqda ittiham olunan Etibar Məmmədovun və adam öldürməkdə ittiham olunan Əli Ağaminin qaçdığını təsdiq edib.

Bununla yanaşı, hüquq- mühafizə orqanları hadisə ilə bağlı hələ rəsmi məlumat yaymayıblar. -03B-