Penitensiar Xidmət vicdan məhbusunun səhhətinin ağır olmadığını bildirir

Vicdan məhbusu Vidadi İsgəndərlinin səhhətinin ağır  olması ilə bağlı Cənubi Qafqaz Hüquq Müdafiəçiləri Şəbəkəsinin (CQHMŞ) Azərbaycan bölməsi Penitensiar Xidmətə müraciət edib. Bu haqda Turan-a hüquq müdafiəçisi Səidə Qocamanlı bildirib.

    O, son vaxtlar bəzi mətbuat orqanlarında V.İsgəndərlinin səhhətinin ağırlaşması ilə bağlı yazıların narahatlıq doğurduğunu qeyd edib. Penitensiar Xidmətin həbsxanalar üzrə mərkəzləşdirilmiş xəstəxanasının baş həkimi Rafael Mehdiyevə müraciət olunub. R.Mehdiyev V.İsgəndərlinin qanında şəkər dozasının normadan nisbətən yüksək olduğunu desə də mətbuatda yazıdlığı qədər ağır olmadığını nəzərə çatdırıb. Elə buna görə də V.İsgəndərlinin xəstəxana rejiminə keçirilməsinə ehtiyac olmadığını söyləyib. Amma vicdan məhbusu V.İsgəndərlinin səhhətinin vətəndaş cəmiyyəti institutları təmsilçilərinin diqqət mərkəzində olduğu üçün ciddi nəzarətdə saxlanacağını vurğulayıb.

    Vidadi İsgəndərli 2011-ci il aprelin 17-də İctimai Palatanın mitinqində həbs olunub. Buna qədərsə 2010-cu ilin parlament seçkilərinə namizəd kimi qatılan V.İsgəndərli hüquq-mühafizə orqanlarını, xüsusən, baş prokuror Zakir Qaralovu ağır ittihamlara məruz qoyurdu. 2011-ci ilin aprel akisyasında iştiraka görə 15 vicdan məhbusunun əksəriyyəti  bu il iyunun sonunda əfv fərmanı ilə azadlığa buraxılsa da AXCP məsulu Şahin Həsənli və hüquq müdafiəçisi V.İsgəndərli azadlığa buraxılmayıb. -05B-