P.Həşimlinin işi üzrə prosesdə məhkəmə müdafiə tərəfin vəsatətini təmin etməyib

Bu gün Bakı Ağır Cinayətlər Məhkəməsində jurnalist və hüquq müdafiəçisi Pərviz Həşimlinin işi üzrə fevralın sonlarında başlamış proses davam edib.

Vəkil Elçin Sadıqovun Turan-a verdiyi məlumata görə, bugünki iclasa çağırılmış iki şahid gəlməyib. O, həmçinin bildirib ki, məhkəmə müdafiə tərəfin irəli sürdüyü bütün vəsatətləri rədd edib. Xüsusən, məhkəmə Rusiya hərbi zavoduna cinayət işində maddi dəlil kimi göstərilən tapançaların hansı ölkəyə ixrac edildiyi barədə sorğu göndərməkdən imtina edib. İstintaqın məlumatına görə, onlar İrandan gətirilib. Lakin müdafiə tərəfi bu versiyanı şübhə altına qoyur.

Bundan başqa, məhkəmə Hüseyn adlı İran vətəndaşının sərhədi keçməsi ehtimalı haqqında videomaterialları istəməkdən imtina edib.

Müdafiə tərəfi hesab edir ki, Hüseyn adlı şəxs həqiqətən Biləsuvarda iş üzrə digər fiqurant Təvəkkül Qorbanova silah veribsə, Sərhəd Xidmətində onun sərhədi keçməsi barədə məlumatlar olmalıdır. Hüseyn Azərbaycana şəxsi avtomobili ilə gəlibsə, mütləq sərhəd buraxılış məntəqəsindən sərhədi keçməli idi.

Ümumilikdə, vəkilin fikrincə, işdə bir çox qeyri-dəqiqliklər və uyğunsuzluqlar var.

Məhkəmənin növbəti iclası aprelin 17-də keçiriləcək.

Pərviz Həşimli 17 sentyabr 2013-cü ildə MTN əməkdaşları tərəfindən həbs edilib. Martda həbs müddəti üç ay artırılıb. O, 206.3.2 (qaçaqmalçılıq) və 228.2.1-ci (qanunsuz silah əldə etmək, saxlamaq) maddələrlə ittiham olunur. Jurnalist özünü təqsirli bilmir, istintaq zamanı ondan bir sıra vəzifəli şəxslərə qarşı guya müxalifəti maliyyələşdirdikləri barədə ifadə alıblar. Ondan həmçinin AXCP lideri Əli Kərimliyə qarşı ifadə verməyi tələb ediblər. -04B-