Polşanın LOT şirkəti Cümhuriyyət Günündə Varşava və Bakını birləşdirdi

Bakı/29.05.22/Turan: Polşanın LOT aviaşirkəti Varşava-Bakı marşrutu üzrə ilk uçuşunu həyata keçirib. Aviaşirkətin təyyarəsi mayın 27-də saat 23:00-da Varşavadan havaya qalxıb və 4 saat sonra, mayın 28-də, Azərbaycan Cümhuriyyət Gününü qeyd edərkən Bakıya enib.

“Polşa LOT hava yolları Varşavadan yeni əlaqələr açır. Biz milli aviadaşıyıcının bortunda Qafqazın ən böyük şəhərinə - Bakıya uçacağıq. Bağlantı xüsusi işgüzar əhəmiyyət kəsb edir, çünki Azərbaycan uzun illərdir ki, Polşanın mühüm iqtisadi tərəfdaşıdır”, - cümə günü Polşanın LOT aviaşirkəti bildirib.

Milli aviadaşıyıcı Azərbaycanın paytaxtına çərşənbə axşamı, çərşənbə, cümə və şənbə günləri uçacaq. LOT Polish Airlines  prezidenti Rafal Milçarski xatırladıb ki, bu il Polşa və Azərbaycan arasında diplomatik münasibətlərin qurulmasının 30 illiyi tamam olur.

“Bakı ilə əlaqənin açılmasını elan etmək xüsusilə sevindiricidir. Mən qəti şəkildə inanıram ki, birbaşa reys Azərbaycanda Polşa irsinin gələcək təbliğinə xidmət  və iki ölkə arasında əlaqələri möhkəmlənməsinə xidmət edəcək. Azərbaycandakı polşalı memarlar Polşadan gələn turistləri gözəl abidələrlə sevindirəcəklər”, - Milçarski deyib.

O, həmçinin qeyd edib ki, LOT vasitəsilə Nyu-Yorka, Çikaqoya və digər şəhərlərə transatlantik şəbəkə azərbaycanlılar üçün də mövcud olacaq.

Azərbaycanın Polşadakı səfiri Nərgiz Qurbanova jurnalistlərlə görüşündə bildirib ki, Bakı ilə LOT əlaqəsinin işə salınması Azərbaycanda Polşa irsi və öz ölkəsinin mədəniyyəti, incəsənəti, mətbəxi, təbiəti və iqtisadi inkişafı haqda bilgi əldə etməyə imkan verəcək və bu konteksdə mühüm neft və təbii qaz yataqlarına işarə edib.

"Azərbaycan və Bakıda Polşa izləri var. 19-20-ci əsrlərin qovuşuğunda Azərbaycanda fəaliyyət göstərən polşalı memarların nailiyyətləri Azərbaycan mədəniyyətinin, elminin və sənayesinin inkişafına mühüm töhfələr verib", - o bildirib.

Polşa memarları tərəfindən layihələndirilən binalar barədə danışan səfir 19-cu və 20-ci əsrlərin qovuşuğunda Bakıda meriyanın binası, Tağıyev Sarayı, Tağıyev Teatrı, Rotşildlərin ofis binası və Azərbaycan Milli Bankının mənzil-qərargahı kimi bir çox sanballı binaların yaradıcısı olmuş Yuzef Qoslavski və Kazimej Skureviçi xüsusilə qeyd edib.

Onun sözlərinə görə, Bakının tarixi ərazisində Polşanın dörd görkəmli memarının xatirəsinə həsr olunmuş küçə var. Yuzef Qoslavski, Kazimej Skureviç, Yuzef Ploşko və Yevgeniuş Skibinskinin şərəfinə xatirə lövhəsi quraşdırılıb. Yanında onların şəhərdə yaratdıqları bir sıra işlərə dair fotolar yerləşdirilib: Səadət Sarayı, Elmlər Akademiyasının Rəyasət Heyəti, Bakı meriyası və Memarlar İttifaqı.

Bakıya ilk reysin açılış mərasiminə LOT aviaşirkətinin baş icraçı direktoru və İdarə Heyətinin sədri Rafal Milçarskinin rəhbərlik etdiyi nümayəndə heyəti gəlib.

Qonaqları AZAL prezidenti Cahangir Əsgərov qəbul edib. Görüş zamanı ikitərəfli əməkdaşlığın perspektivləri müzakirə olunub. Hava əlaqəsinin açılması münasibətilə bir-birini təbrik edən tərəflər uçuşların davamlı olacağına ümid etdiklərini bildiriblər. İki ölkə arasında uçuşların başlanması turist axınını artırmağa və  Azərbaycanla Polşa arasında işgüzar əlaqələri genişləndirməyə imkan verəcək.

Polşa-Azərbaycan avia marşrutunun açılışı münasibətilə mayın 28-də axşam İçərişəhərdə “ArtGarden”də bayram münasibətilə qəbul keçirilib. –0—