Qarabağın cənubunda iki hərbçi həlak olub

Mayın 28-nə keçən gecə Qarabağın cənubunda erməni təxribat qrupunun Azərbaycan Silahlı Qüvvələrinin postuna hücumu zamanı iki hərbçi həlak olub. Erməni tərəfdən də itki var. Müdafiə Nazirliyinin mətbuat xidməti bildirib.

Mənbənin məlumatına görə, çərşənbə gününə keçən gecə erməni təxribatçılar Füzuli rayonunda Azərbaycan ordusunun postuna hücum ediblər. Azərbaycan ordusunun əsgər və zabitlərinin igidliyi sayəsində hücum dəf edilib. Düşmən itki verərək geri çəkilib.

Döyüş zamanı kapitan Fikrət Məmmədov (1982-ci ildə anadan olub) və gizir Xudaverdi Əbilov (1991) həlak olublar. Əsgər Mehman Mirzəzadə (1994) ağır yaralanıb. 

F.Məmmədov göstərdiyi igidliyə görə “İgidliyə görə” (ölümündən  sonra) medalına təqdim olunub.

Müdafiə naziri general-polkovnik Zakir Həsənovun əmri ilə X. Əbilov “Hərbi xidmətdə fərqlənməyə görə” (ölümündən sonra) medalı ilə təltif edilib.

Müdafiə Nazirliyinin rəhbərliyi şəhidlərin doğmalarına və yaxınlarına dərin hüznlə başsağlığı verib.

Hazırda həmin ərazidə vəziyyətə Azərbaycan ordusu nəzarət edir.

Ermənistan KİV-in məlumatına görə, Azərbaycan təxribatçıları erməni tərəfə keçməyə cəhd göstəriblər. Döyüşlər zamanı erməni yefreytor Erik Qasparyan həlak olub.—06D-