Qış bulvarının palmaları

Hakimiyyət ciddi-cəhdlə Qış bulvarının birinci hissəsinin açılışına hazırlaşır. Bununla əlaqədar şəhər icra başçısı Hacıbala Abutalıbov gecə-gündüz bu bölgədə dolaşır.

Bu gün də o, şəxsən yerdə qazılmış dəliklərin keyfiyyətini yoxlayıb (yeraltı dayanacaq divarlarının möhkəmləndirilməsi üçün yerə basdırılmış geniş diametrli metal dirəklər).

Abutalıbov bu dəlikləri bir-bir diqqətlə yoxlayıb, sanki onların dərinliyini ölçür və işlərin nə dərəcədə keyfiyyətli görüldüyünü yoxlayır.

Onun fikrini aydınlaşdırmaq mümkün olmayıb, çünki mer özü və işçiləri köçürüləcək tarixi binanın taleyi ilə maraqlanan mətbuatla ünsiyyətdən imtina ediblər. 

Eyni zamanda, çox güman ki, cənub ölkələrindən misli görünməmiş qiymətə gətirilmiş hündür və çoxillik palmalar jurnalistlərin gözündən yayınmayıb. Ümumiyyətlə, palmalar merin zəif nöqtəsidir və o haraya getsə, orada palma əkir. Görünür bu yolla o, “Hacıbala burada olub” ifadəsini palmalarla əvəz edərək, öz ərazilərini işarələyir.

Amma palma məsələsi az-çox başa düşülsə də, meri müşahidə edən jurnalistlər onun yerə basdırılmış dirəklərdə nə axtardığını heç cür anlaya bilməyiblər, bəlkə o, bu dəliklərin kanalizasiya olduğunu zənn edib?

Yaxın günlərdə bu ərazidə mətbuatı çox sayda sürprizlər gözlədiyini düşünmək olar. Əsas odur ki, Hacıbala oraya gəlsin və ağzını açsın. Sonra jurnalistlər bir əlləri ilə bərk-bərk diktofonu tutmalıdırlar, o biri əlləri ilə isə qarınlarını – gülməkdən yerlərə yıxılmamaq üçün. -02В-