VHP iqtidarı islahatlara çağırır

Vətəndaş Həmrəyliyi Partiyası (VHP) ölkədəki son siyasi təzyiq və həbslərlə bağlı bəyanat qəbul edib. 

Müəlliflər son aylar Azərbaycan ictimai-siyasi həyatında öz fəallıqları ilə seçilən insanlara, vətəndaş cəmiyyəti qurumlarına qarşı aparılan siyasi təzyiqlərin ən yüksək səviyyəyə çatdığını bildirirlər. 

Belə siyasi fəalların həbsləri, bu həbslərlə bağlı istintaqın qeyri-şəffaflığı iqtidarın siyasi rəqiblərinə qarşı qeyri-sivil və qanunsuz metodlardan istifadəsinin təsdiqi kimi dəyərləndirilir. 

“EL” Hərəkatının ofisinin bağlanması, regionlara səfər edən ictimai-siyasi xadimlərə təzyiqlər, yerli icra başçılarının özbaşınalığının ölkə üçün təhlükərə yol açdığı nəzərə çatdırılır. İqtidarln bu siyasətinin ölkənin imicinə ağır zərbə olması, ölkəni təcridə yuvarlaması vurğulanır. “Beynəlxalq təcrid isə ölkənin ümumilli problemlərinin həllində mənfi mənada mütləq öz təsirini göstərir”, - deyə müəlliflər rəsmi Bakıya xəbərdarlıq edirlər. 

Ölkənin təbii sərvətləri hesabına qazanılan uğurları ölkə içində repressiya və siyasi təzyiqlərlə heçə endirmək ölkənin gələcəyini təhlükə altına qoymaq sayılır. 

Prezident seçkiləri olan 2013-cü ildə iqtidarın repressiv siyasətnin təhlükəli tendensiyanın yaranmasına səbəb ola biləcəyi qeyd edilir. 

Müəlliflər bu siyasi təzyiqləri qətiyyətlə pisləyir, rəsmi Bakını vətəndaş cəmiyyətləri, siyasi birliklərlə zor dilində danışmağa son qoymağa, demokratik təsisatlara aqressivlikdəın əl çəkməyə və köklü islahatlara başlamağa çağırır. -05D-