Qiyas İbrahimov aclıq elan edib

Bakı/23.06.23/Turan: İyunun 22-də inzibati qaydada 30 sutka müddətinə həbs olunmuş fəal Qiyas İbrahimovun aclıq aksiyasına başladığı bildirilir.

Fəalın anası Şura Əmiraslanova Turan-a bildirib ki, İbrahimov özü bu gün zəng vuraraq bu barədə məlumat verib.

Əmiraslanova qeyd edib ki, oğlu Söyüdlü kəndində polis zorakılığına, qanunsuz həbsinə və saxlandığı Daxili İşlər Nazirliyinin İnzibati Həbs Olunanların Saxlanma Məntəqəsində üzləşdiyi qeyri-insani rəftara etiraz olaraq müdəttsiz aclığa başladığını bəyan edib. 

Məsələ ilə bağlı Daxili İşlər Nazirliyindən münasibət öyrənmək mümkün olmayıb.

Fəal Qiyas İbrahimov iyunun 22-də İnzibati Xətalar Məcəlləsinin 388.1.1-ci (İnternet informasiya ehtiyatının və onun domen adının sahibi və ya informasiya-telekommunikasiya şəbəkəsinin istifadəçisi tərəfindən internet informasiya ehtiyatında yayılması qadağan edilən informasiyanın yerləşdirilməsi, habelə belə informasiyanın yerləşdirilməsinin qarşısının alınması ilə bağlı qanunvericiliyin tələblərinin pozulmasına) və 535-ci (polis işçisinin və ya hərbi qulluqçunun qanuni tələbinə qəsdən tabe olmama) maddələri ilə 30 sutka müddətinə həbs olunub.

O, sosial şəbəkədə Gədəbəy hadisələri zamanı polisin fəaliyyətini kəskin tənqid etmişdi. 0