Ramazan ayı iyunun 7-nə təsadüf edir

Qafqaz Müsəlmanları İdarəsinin (QMİ) Qazılər Şurası və Elmi-Dini Şurasının bugünkü toplantısı bu il Ramazan ayı ilə bağlı fətva yayıb.

Fətvada deyilir ki, Şamaxı Astrofizika Rəsədxanasının builki hesablamalarına əsasən ölkə ərazisində Ramazan ayının 1-i Ayın görünməsi ilə miladi təqvimilə iyunun 7-nə təsadüf edir və beləliklə, islamın vacib buyurduğu orucluq başlayır. Eyni zamanda Fətvada deyilir ki, orucluq bayramı iyul ayının 6-na təsadüf edir.

Bununla bağlı QMİ rəsədxana ilə birgə Azərbaycan ərazisi üfüqünə uyğun olaraq Ramazan ayının əvvəli, namaz vaxtları, bu ayın gündəlik duaları, eləcə də bayram tarixini müəyyənləşdirən xüsusi təqvim və yaddaş kitabçası tərtib edib.

Qazılar Şurasının qənaətinə görə, bugünkü iqtisadi duruma uyğun olaraq  adambaşına 5-10 manat arası fitrə zəkatının verilməsi tövsiyə edilir.

QMİ Qazılar Şurası və Elmi-Dini Şurası din xadimlərinə bir daha xəbərdarlıq  edir: “Şəriətə görə, Ramazan ayı ərzində iftardan öncə açılan süfrələrdə iştirak etmək böyük günahdır. Bu xəbərdarlığı nəzərə almayan din xadimlərinin barəsində ciddi tədbirlər görüləcək”.-05D-