Rasim Əliyevin həmkarları məhkəmə qarşısında aksiya keçiriblər

Yanvar 12-də bir qrup jurnalist  Bakı Ağır Cinayətlər Məhkəməsinin önündə piket  keçirib. Turan-ın  müxbirinin verdiyi məlumata görə,  jurnalistlər  əllərində  ötən il  avqustun 8-də  döyülürək öldürülən Rasim Əliyevin şəkillərini  “Həkimlər  məsuliyyətə cəlb edilsin!” “Jurnalist ölümünə son!” şüarlarını qaldırıblar.

Jurnalist həmkarlar bu iş üzrə Rasimi müayinə və müalicə etmiş həkimlərin də istintaqa cəlb edilməsini istəyiblər.

Polis  piketə  müxdaxilə edərək jurnalistlərin əllərində olan şəkilləri və şüarları alıb. Saxlanılan yoxdur.

Hazırda R. Əliyevin ölümündə təqsirli bilinən beş nəfər məhkəmə qarşısında dayanıb. Mətbuat nümayəndələrinin çoxu  iclasa buraxılmayıb.

Bu gün Kənan Mədətov, Camal Məmmədov və Samir Mustafayev məhkəmə qarşısına çıxarılıb. Onlar 126.3-cü (qəsdən sağlamlığa ağır ziyan vurma, zərərçəkmişin ölümünə səbəb olduqda). Elşən İsmayılov və Arif Əliyev oğurluqda (177.1-ci maddə) ittiham olunur.

Bir müddət əvvəl zərərçəkmiş tərəfin vəkili futbolçu Cavid Hüseynovun barəsində işin ayrı icraata götürülməsi ilə razı olmadığını bildirib. İdmançı CM-in 307.1-ci (hazırlanan cinayət haqqında məlumat verməmə) və 307.2-ci (cinayəti gizlətmə) maddələri ilə ittiham olunur.

Lakin jurnalistin doğmaları hesab edirlər ki, məhz C.Hüseynov cinayətin təşkilatçısıdır.

* Reportyorların Azadlıq və Təhlükəsizlik İnstitutunun üzvü və ann.az agentliyinin müxbiri Rasim Əliyev 2014-cü il avqustun 8-də bir qrup şəxs tərəfindən döyülüb, bundan sonra Şəhər Kliniki Mərkəzində dünyasını dəyişib. Hadisəyə R.Əliyevin “Qəbələ” FK-nın futbolçusu Cavid Hüseynovun haqqında tənqidi statusu səbəb olub. Jurnalistin ölümü faktı üzrə cinayət işi ilə əlaqədar C.Hüseynov da daxil olmaqla, altı nəfər cinayət məsuliyyətinə cəlb edilib. Lakin ibtidai istintaqın sonunda C.Hüseynovun barəsində iş ayrıca icraata götürülüb. -16C06-