REAL üzvünün səhhəti pisləşib

REAL Hərəkatının fəalı, həbsdə olan Rəhim Şalıyevin səhhəti pisləşib. O, Sumqayıt şəhər polisinin təcridxanasında saxlanılır.

Vəkil Yalçın İmanov Turan-a bildirib ki, R.Şalıyev polisdə möhkəm döyüldüyünə görə güclü baş ağrıları başlayıb.

Xatırladaq ki, R.Şalıyev fevralın 20-də saxlanılıb və həmin gün polisə tabe olmamaq ittihamı ilə 30 sutka inzibati həbs edilib.

Vəkil xatırladıb ki, gənc saxlandıqdan sonra dəfələrlə döyülüb.

Otən gün ona təcili tibbi yardım çağırılıb. “Başının sol hissəsində gicgahdan yuxarıda zərbə izi aydın görünür. Həkimlər deyiblər ki, ancaq ağrıkəsici iynələr vura bilərlər”, - Y.İmanov bildirib.

Fevralın 23-də ombudsmanın nümayəndələri R.Şalıyevə baş çəkiblər. Fəalın bədənindəki döyülmə izlərini onlar da görüblər.

Fevralın 27-də Sumqayıt Şəhər Məhkəməsində R.Şalıyevin apellyasiya şikayətinə baxılması davam edəcək.

Vəkil ümid edir ki, məhkəmə fəalın günahsız olması ilə yanaşı onun səhhətini də nəzərə alacaq və onu azad edəcək.

Fevralın 22-də vəkil işgəncə faktı ilə bağlı prokurorluğa şikayət verib.

REAL Hərəkatının Sumqayıt təşkilatının rəhbəri Hafiz Babalı bildirib ki, işgəncələrin qarşısının alınması üzrə Milli preventiv Mexanizmin nümayəndələri də R.Şalıyevə baş çəkiblər.

“Ombudsman aparatından mənə məlumat verildi ki, R.Şalıyevə işgəncələr barədə  şikayət ilə əlaqədar prokurorluğa müraciət göndəriblər”,- H.Babalı qeyd edib.06D--