Rüfət Səfərovu Müdafiə Komitəsi Avropa Şurasında görüşlərə başlayacaq

Rüfət Səfərovun qanunsuz həbsi ilə bağlı xarici ölkələrin Azərbaycandakı səfirliklərinə, Avropa İttifaqına, Avropa Şurasına müraciətlər hazırlanıb. Səfirliklərdə, beynəlxalq təşkilatların nümayəndəliklərində görüşlərə başlanılır, Müdafiə Komitəsinin üzvləri Avropa Şurasında görüşlər keçirir. Bu barədə Zərdab Rayon Prokurorluğunun keçmiş müstəntiqi, həbsdə olan Rüfət Səfərovun Hüquqlarını İctimai Müdafiə Komitəsinin noyabrın 11-də keçirilən iclasında bildirilib.

Keçmiş müstəntiq parlamentin keçmiş deputatı, hakim Yeni Azərbaycan Partiyasının yaradıcılarından biri Eldar Sabiroğlunun oğludur. E.Sabiroğlu ötən il Prezident Administrasiyasının rəhbəri Ramiz Mehdiyevin ünvanına sərt çıxışlar edib. Dekabrda R.Səfərov qanunçuluğu pozmasına və hüquq-mühafizə orqanlarının pis işinə görə hakimiyyəti açıq tənqid edib. O, prokurorluq orqanlarından çıxdığını bildirib. Öz növbəsində prokurorluq bəyan edib ki, R.Səfərov “prokurorluq işçisinə yaraşmayan hərəkətə” görə işdən çıxarılıb.

2016-cı il yanvarın 15-də R.Səfərov rüşvət almaq ittihamı ilə həbs olunub. Lakin yanvarın 22-də ev dustaqlığına buraxılıb. R.Səfərov ittihamı rədd edib və cinayət işinin sifariş olduğunu bildirib. O, ev dustaqlığı dövründə də mövqeyindən geri çəkilməyib, iqtidarı tənqid edən bəyanatlarını davam etdirib.

R.Səfərov ittihamı qəbul etmir və siyasi sifariş hesab edir.

Müdafiə Komitəsinin rəhbəri, Azərbaycan Ziyalılar Birliyinin sədri Eldəniz Quliyev bildirib ki, R. Səfərovun ictimai Müdafiə Komitəsinə Prezident Administrasiyasından başlayaraq hüquq- mühafizə orqanları və  digər qurumlardan təzyiqlər və  təsirlər var.

“Müdafiə Komitəsinin təsis edilməsi hökumət qurumlarına çox ciddi təsir edib”, - o vurğulayıb.

Bu fikirləri vəkil Bəhruz Bayramov da təsdiq edib və  bildirib ki, artıq onun vəkillik fəaliyyəti ilə bağlı baş prokurorun birinci müavini  Vəkillər Kollegiyasına müraciət edib.

“Müdafiə Komitəsinin birinci iclasından sonra Rüfət Səfərovla əlaqələrinə görə işdən azad edilən və  bu səbəbdən ABŞ-da sığınacaq alan keçmiş prokuror mənimlə bağlı şikayət edib. Guya mən onu prokurorluğun əleyhinə bəyanat verməyə öyrətmişəm”, - B.Bayramov qeyd edib.

İclasda siyasi məhbus problemi də diqqət mərkəzində olub. Məsələnin daim diqqət saxlanmasının vacibliyi qeyd edilib. Eyni zamanda, son vaxtlar siyasi məhbusları müdafiə edən vəkillərə qarşı təzyiqlərin geniş vüsət aldığı bildirilib.

“Siyasi məhbus məsələsi beynəlxalq diqqətdədir və prioritetdir. Bu səbəbdən hüquq müdafiəçilərinə və vəkillərə qarşı  təzyiqlər daha da güclənəcək. Biz bilirik ki, siyasi məhbus məsələsinin arxasında hazırki rejim durur və onlar siyasi məhbusların sayının artması ilə bağlı məlumatların yayılmasında maraqlı deyil. Bu səbəbdən hökumət istəyir ki, siyasi məhbusların sayının azalması barədə məlumatlar yayılsın, guya problem həll olunur. Ona görə, bizim siyasi məhbusların sayının 166 olması barədə  yaydığımız məlumatlar hamını narahat edir. Bu, hökumətlə işləyən gözəgörünməz dostlarımızı da narahat edir. Əslində ölkədə  siyasi məhbusların sayı 166-dan daha çoxdur. Ölkədə nə qədər məhbus varsa, onların əksəriyyəti ədalətsiz mühakimə olunub”, - keçmiş vicdan məhbusu Əvəz Zeynallı bildirib.

Ölkədə rəsmi qeydiyyatda olan hüquq- müdafiə təşkilatlarının da işi tənqid edilib.

“Rəsmi qeydiyyatı olan çoxsaylı hüquq- müdafiə təşkilatları QHT-lərə Dövlət Dəstəyi Fondundan böyük miqdarda qrant alır. Bəs, bu təşkilatlar niyə Rüfət Səfərovun hüquqlarını müdafiə etmir? Niyə Çingiz Qənizadə, Sahib Məmmədov, Novella Cəfəroğlu, Səidə  Qocamanlı və  digərləri “Nardaran işi” məhkəməsinə gəlmirlər, Rüfət Səfərovu və  digərlərini müdafiə etmirlər?”- hüquqşünas Namizəd Səfərov qeyd edib.

Hüquq müdafiəçisi Oqtay Gülalıyev R. Səfərovla bağlı iş aparıldığını, hüquq müdafiçəsi Leyla Yunus xəstə olmasına baxmayaraq, görüşlərində R.Səfərovun məsələsini qaldırdığını diqqətə çatdırıb.

Bu zaman iclasda iştirak edən R. Səfərovun atası Eldar Sabiroğlu təəssüflə deyib: “Mən vaxtilə Leyla Yunusu nə qədər tənqid etmişəm…”.-03C-