«Nardaran işi» məhkəməsi davam edir

Noyabrın 11-də Bakı Ağır Cinayətlər Məhkəməsində “Müsəlman Birliyi” Hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və ötən il noyabrın 26-da Nardaranda baş vermiş hadisələrdə təqsirləndirilən şəxslərin məhkəməsi keçirilib.

Hakim Əlövsət Abbasovun sədrlik etdiyi iclasda çıxış edən Cabbar Cabbarov deyib: “Sizlər bizi bura akvariuma salmısınız. Bizi burada elə bağlayırsınız ki, guya biz sizə hədə- qorxu gəlirik”.

Hakim isə bildirib ki, bütün məhkəmələrdə zallar belədir. Sadəcə, iki zal qalmışdı. Onu da bu müddət ərzində düzəldiblər.

Daha sonra Abbas Hüseynov məhkəmənin ədalətsiz keçirildiyini deyib: “Hakimin mikrafonundan səs gur, bizimkindən zəif çıxır. Ədalətsizlik bundan bilinir. İstəyirəm səsim elə gur olsun ki, Prezident Aparatı, Milli Məclisdə eşidilsin. Bizə istintaq zamanı şərəf və ləyaqəti alçaldan işgəncələr verilib. Deputat Zahid Oruc kimilər isə bununla bağlı özlərinə sərf edən şəkildə danışırlar. Bizə verilən işgəncələrin bir faizi Zahid Oruca verilsəydi İlham Əliyevin üzünə durardı. Onun kimliyi hər kəsə məlumdur. Ramil Usuobov bizim dostlarımıza əziyyət edib işgəncə almaq əvəzinə Zahid Oruc kimilərdən istifadə edə bilərdi. O gəlib rahat üzə dura bilər. Bizə işgəncə verənlərin kimliyi məlumdur. Təqsirləndirilən şəxslərin ailə üzvləri təhdid olunub, şahidlərə təzyiq göstərilib. Xahiş edirəm, həmin şəxslərin barəsində tədbir görülsün”.

Vəkil Yalçın İmanov isə deyib ki, Kərim Əlimərdanov dəhşətli bir əməliyyat keçirib: “Bu adam özünü nə hesab edir? Doğrudanmı, onun barəsində tədbir görmək bu qədər çətindir? Şahidlərə təzyiq edilməsi məhkəməyə birbaşa müdaxilədir”.

F. Qəhrəmanlı isə şahidlərə polis idarəsində işgəncə verilməsinin artıq vaxt apardığını deyib. “Təklif edirəm onlar məhkəməyə gətirilsinlər və burada işgəncə verib əleyhimizə ifadə alsınlar. Məhkəmə də sürətli  keçsin”, - o vurğulayıb.

Təqsirləndirilən İbrahim Xudaverdiyev isə bildirib ki, ona edilən işgəncələr barəsində danışandan sonra hazırda həbsdə olan oğlunu incidiblər: “Ona görə qorxumdan gördüklərimi danışmıram. Mənə desəniz ki, Əbülfəz Bünyatovun evində namaz qılmağa görə sənə 20 il cəza veririk qəbul edəcəm, əgər desəniz ki səndə qumbara olub və 2 il cəza veririk, bunu qəbul etməyəcəm. Çünki məndə qumbara olmayıb”. 

Daha sonra vəkil Yalçın İmanov deyib ki, Taleh Bağırzadənin müraciət kitabı adlanan kitabça iş materiallarında yoxdur: "Onlar Baş Mütəşəkkil Cinayətkarlıqla Mübarizə İdarəsində saxlanılır. İstəyirik onunla tanış olaq”.

Hakim bununla bağlı həmin orqana müraciət ediləcəyini deyib.

Vəkil Nemət Kərimli isə deyib ki, Baş Prokurorluq və Daxili İşlər Nazirlyinin birgə məlumatında polislər qəhrəman, qarşı tərəf isə cinayətkar kimi göstərilib. O, bununla təqsirsizlik prezumpsiyasının pozulduğunu deyib və həmin məlumatın iş materiallarına əlavə edilməsini istəyib. Məhkəmə vəsatəti təmin edib.

Daha sonra şahid qismində Balababa Allahnəzərov ifadə verib. O, F. Qəhrəmanlının statusuna şərh yazdığı üçün istintaq zamanı dindirilib. Bildirib ki, istintaq zamanı təzyiqə məruz qaldığı üçün yazılan ifadəni imzalamağa məcbur olub. O, istintaqa verdiyi ifadədən imtina edib.”Bu “Yuxu” filminə oxşayır. Bir statusa şərh yazmağa görə istintaqa çağrılmışam. Hər kəs bilir ki, ölkədə problemlər var. Bununla bağlı yazılan statusa şərh yazmaq  cinayət deyil. Onlar hətta mənim qadınımın belə adını yazmışdılar. Həyat yoldaşımı işdən çıxarmaqla, qohumlarımla hədə- qorxu gəldilər”.

Daha sonra şahid Elxan Məmmədov ifadə verib. O, bildirib ki, F. Qəhrəmanlının statusuna şərh yazıb və heç bir təzyiq altında olmadan istintaqda ifadə verdiyini deyib. “Mən şərh yazsam da Fuad Qəhrəmanlının fikirlərini dəstəkləmirəm. O, adamları mitinqə dəvət edirdi”.

Vəkil Y. İmanov isə ondan bəyənmədiyi adamın statusuna niyə "like" işarəsi qoyub, şərh yazdığını soruşub:"Siz orada şərh yazmısınız ki, “Ac camaatı oyandırmaq lazımdırmı?”Sizin şərhiniz daha radikal olub". Şahid isə sosial şəbəkəni ciddi hesab etmədiyi üçün şərh yazdığını deyib:"Mən istintaqa çağrılandan sonra anladım ki, səhv etmişəm. Burun girməyən yerə baş soxmaq olmaz. Bundan sonra çalışıram heç kimə şərh yazmayım. Bildim ki, dediyin sözün arxasında durmaq lazımdır". Daha sonra onun istintaqa verdiyi ifadə elan edilib. O, istintaq zamanı verdiyi ifadələrin bəzi hissələrindən imtina edib.

Daha sonra iclasda şahid qismində Zahid Mehdiyev ifadə verib. Balakən sakini olan Z.Mehdiyev deyib ki, məhkəməyə çağırıldığı üçün rayondan gəlib: “Mən Fuad Qəhrəmanlını ancaq mediadan və sosial şəbəkədən tanımışam. Onun bir statusunu tam dərk etmədən şərh yazmışam və buna görə peşmanam”. Məhkəmədə məlum olub ki, Z. Mehdiyev yazdığı şərhdə Avropanı ikiüzlü siyasət aparmaqda qınayıb. O, Fuad Qəhrəmanlının fikirlərini dəstəkləmədiyini, istintaq zamanı ona hər hansı təzyiq olmadığını, xaos, iğtişaş, mitinq təbliğ edən bütün fikirlərə qarşı olduğunu deyib.

Vəkil Y. İmanov deyib ki, hər kəs fikrini sərbəst şəkildə ifadə etmək hüququna malikdir. Vəkilin  “Siz Avropanı ittiham etmisiniz. Burada peşman olmalı nə var axı? Qərb ölkələri sizə təzyiq edib ki, peşman olmusunuz?” sualına şahid cavab olaraq “yazmamalı idim. Tam dərk etmədən yazdım” cavabını verib. Bundan əlavə şahid bildirib ki, hazırda heç kimin siyasi statusuna şərh yazmır: “Ancaq idman və əyləncə xarakterli statuslara şərh yazıram”.

F. Qəhrəmanlı şahidə bildirib ki, mitinqlə iğtişaş başqa-başqa anlayışlardır. Şahid hər ikisinə qarşı olduğunu deyib: “Ölkədəki sabitliyi qorumaq lazımdır”. F. Qəhrəmanlı isə ona “Heç Oxford Universitetində yarım saata fikir dəyişmək olmur. Necə oldu “bandotdel”də ifadə verəndən sonra fikriniz dəyişdi” sualını verib. Şahid ona heç bir təzyiq olmadğını deyib.

T. Bağırzadə bildirib ki, ölkədə təkcə müxalifət yox, iqtidar da mitinq keçirir. Bunun da başında İlham Əliyev dayanır. “İndi siz İlham Əliyevi iğtişaşçı hesab edirsiniz?”-, o sual edib. Şahid isə ona “mənə dolandırıcı suallar verməyin” cavabını verib.

Daha sonra hakim bildirib ki, şahidlər – Samir Babayev və Valeh Abbasovun polis idarəsində təzyiqə məruz qalması faktının araşdırılması ilə bağlı Bakı Şəhər Prokurorluğuna etdikləri müraciətə cavab gəlib. Həmin məktubda faktın təsdiqini tapmadığı qeyd edilib.

Abbas Hüseynov isə bildirib ki, hazırda Azərbaycanda olan erməni hüquq müdafiəçiləri və jurnalistləri Azərbaycanda bir sıra şəxslərlə dostluq və sıx əməkdaşlıq etdiklərini deyiblər: “Onlar düz deyirlər. Azərbaycanda hakimiyyətdə olan və ermənilərlə qohumluq əlaqələri olan Artur Rasizadə, Ramiz Mehdiyev, Zakir Qaralov var. Gömrükdən hər il erməni məhsulları ilə yanaşı tonlarla narkotik maddə də keçirlir və bunu Aydın Əliyev yox, Kəmaləddin Heydərov edir”.

Məhkəmə prosesi noyabrın 14-də davam edəcək.