"Sərhədsiz Reportyorlar" polisi Məhəmməd Mirzəlini qorumağa çağırıb

Paris/25.03.21/Turan: "Sərhədsiz Reportyorlar" beynəlxalq mətbuatı müdafiə təşkilatı Fransa polisini Fransada qaçqın statusuna malik olan azərbaycanlı siyasi mühacir və videobloger Məhəmməd Mirzəlini qorumağa çağırıb. Martın 14-də o, bir qrup şəxsin hücumuna məruz qalıb, Nant şəhərinin mərkəzində ona 10-dan çox bıçaq xəsarəti yetirilib. Üç gün əvvəl onun telefonuna Azərbaycan dilində yeni təhdidlər daxil olub.

"Bu, sonuncu xəbərdarlıqdır", deyə Mirzəlinin martın 21-də, hücumdan düz bir həftə sonra aldığı mesajda bildirilir. "Səni problemsiz öldürə bilərik. Gördün ki, heç nədən qorxmuruq (...). Bacılarımızı təhqir etməyə davam etsən snayper başından vuracaq". Bu mesaja imza kimi "Andres Qraqmel" yazılıb.

2020-ci il oktyabrın 6-da elə həmin Nant şəhərində ona qarşı artıq sui-qəsd törədilib, naməlum şəxs onun mindiyi maşına bir neçə atəş açıb.

Bundan əvvəl, elə həmin il o, Feysbukda messencerə belə bir təhdid mesajı alıb: "Səsini kəsməsən başına gələnləri görəcəksən". Fransa polisi Mirzəliyə hücumla bağlı təhqiqatın gedişatını şərh etməkdən imtina edib.

"On bıçaq yarasından sonra Məhəmməd Mirzəli altı saatdan çox davam edən əməliyyat keçirməli olub. Hələ başa çatmayan təhqiqatın nəticəsini gözləyərkən və onun ünvanına yeni ölüm təhdidlərinin daxil olduğunu nəzərə alaraq, onun polis tərəfindən qorunmasını xahiş edirik", deyə bəyanatda deyilir.

Çox vaxt mühacirətdə yaşayan azərbaycanlı jurnalist və blogerlərin ailələrinin başına gəldiyi kimi, Mirzəlinin ailəsi də təzyiqin qurbanı olub. Onun atası və yeznəsi 2017-ci ildə həbs edilib. Bundan başqa, onun bacısının intim videogörüntülərini ailə üzvlərinə göndərərək, onları Telegram kanalı vasitəsilə yaymaqla hədələnib.  

2016-cı ildən bəri Fransada sıgınacaq alan Mirzəli, ölkə rəhbərliyinə qarşı təhqiramiz və etik baxımdan yersiz çıxışları ilə tanınır. -02D-