Strasburq məhkəməsi satirik şair Mirzə Sakitin şikayətini təmin edib

Avropa İnsan Hüquqları Məhkəməsi (AİHM) noyabrın 12-də satirik şair Mirzə Sakitin (Sakit Zahidovun) 2006-cı ildə qanunsuz narkotik saxlamaq ittihamı ilə üç il azadlıqdan məhrum edilməsi barədə çıxarılmış hökmlə bağlı şikayətindən qərarını elan edib.

AİHM-nin saytında dərc edilmiş məlumata əsasən, məhkəmənin qərarında qeyd edilir ki, Sakitə qarşı cinayət işi "ədalətsiz" araşdırılıb və o, "şübhəli dəlillər" əsasında həbs edilib.

Belə ki, Sakitin geyimində axtarış polisdə saxlandıqdan 20 dəqiqə sonra aparılıb və bu müddət ərzində onun üzərinə narkotik atıla bilərdi. Bu zaman Sakit etibar etdiyi vəkillə əlaqə saxlamaq və onu dəvət etmək imkanından məhrum edilib. Azərbaycan məhkəmələri sözügedən hallara və Sakitin şikayətlərinə məhəl qoymayıblar.

AİHM Sakitin 6-cı maddə (ədalətli məhkəmə təhqiqatı hüququ) üzrə hüquqlarının pozulduğunu etiraf edib və ona dəyimiş mənəvi ziyana görə 9000 avro təzminat və məhkəmə xərclərinin ödənilməsi üçün 3048 avro ödənilməsi barədə qərar qəbul edib.

Mirzə Sakit 2006-cı il iyunun 23-də qanunsuz narkotik saxlamaq ittihamı ilə həbs edilib. 2006-cı il oktyabrın 4-də Ağır Cinayətlər Məhkəməsi Sakiti üç il müddətinə azadlıqdan məhrum edib. Hüquq müdafiəçilərinin fikrincə, iş Sakitin hakimiyyətin nöqsanlarını ələ saldığı satirik şeirləri ilə əlaqədar saxtalaşdırılıb. Sakit Azərbaycan parlamentinin cəza müddətinin bitməsinə üç ay qalmış elan etdiyi amnistiya ilə azad edilib. -06D-