Taleh Bağırzadə işgəncə ilə bağlı şikayətini geri çəkir

“Müsəlman Birliyi” hərəkatının həbsdə olan lideri Taleh Bağırzadə istintaq təcridxanasından “Azadlıq” qəzetinin redaksiyasına göndərdiyi müraciətdə bildirir ki, işgəncə ilə bağlı şikayətini geri götürür.

Bağırzadə qeyd edir ki, ötən ilin yayında azadlığa buraxıldıqdan sonra yenidən həbs olunacağını bilirdi. Bu zaman o başa düşürdü ki, hakimiyyətə artıq onu narkotik, silahla şərləyib tutmaq sərf eləmir. Hakimiyyətin əlinə bəhanə verməmək üçün Bağırzadə ilk çağırışda polisə və MTN-ə gedib. O, polisdə zorakılığa məruz qalıb və bununla bağlı prokurorluğa şikayət verib.

“Bütün bunlara görə bizi terrorçu damğası vurmaqla, qondarma polis əməliyyatı keçirməklə həbs etdilər”, deyə Bağırzadə yazır.

“Həbs edilməmişdən əvvəl hökumətin nəzarətində olan televiziyalarda biz şiələri İŞİD-lə müqayisə edən silsilə qondarma reportajlar verdilər. Təbii ki, bunlara inanan yoxdur. Müsəlman Birliyi Hərəkatı təsis olunarkən onun məramı dinc mübarizəni nəzərdə tutub, biz daim bu amala sadiqik. Biz yeganə təşkilatıq ki, İdarə Heyətimizin bütün üzvləri havadan götürülmə ittihamlarla həbsdədir”, deyə Bağırzadə qeyd edir.

O, həmçinin bildirir ki, saxlanılarkən ağır işgəncələrə məruz qalıb, bu işgəncələr “bandotdel”də (DİN MCMİ) də davam edib. Yalnız Bağırzadə 1 saylı Bakı İstintaq Təcridxanasına keçirildikdən sonra buna son qoyulub.

“Məni heç bir işgəncə sındıra bilməz və ruhiyyəm əvvəlki kimidir. Hər bir başlanğıcın sonu olduğu kimi, bu zülmün də sonu olacaq”, deyə o yazır.

“Məhkəməyə işgəncə ilə bağlı verilmiş haqlı və qanuni şikayət dini camiyyədə müəyyən ruh düşgünlüyü yaratdı. Məhkəmə uzandı və işgəncə izlərinin bir qismi itdi. Eşitdiyimə görə, son məhkəmə vaxtı məhkəmə binasının önünə gələn mömin qardaşlardan yenə həbs olunanlar oldu. 

Bütün bunları nəzərə alaraq, həmin verilmiş şikayəti geri götürmək qərarına gəldim. Mənə, digər mömin qardaşlara qarşı işgəncə vermiş şəxsləri Allaha həvalə edirəm. Onlara səslənirəm ki, insanlıq, insaf hissiniz zərrə qədər qalıbsa, bundan sonra bu hərəkətləri etməyin, tövbə edin. Allah tövbələri qəbul edəndir”, deyə Bağırzadə müraciətini tamamlayır.

Vəkil Cavad Cavadov Turan-ın müxbiri ilə söhbətində bildirib ki, dünən Bağırzadə ilə görüşüb, o, həqiqətən məhkəməyə gələn dindarlara təzyiqlə əlaqədar şikayətini geri götürmək istədiyini deyib.

Lakin vəkil Bağırzadənin “Azadlıq” qəzetinə müraciətindən xəbərsizdir.

Bağırzadənin işgəncələrlə bağlı şikayəti üzrə növbəti məhkəmə iclası fevralın 24-də keçirilməlidir.

Xatırladaq ki, Bağırzadə və onun 10-dan çox tərəfdaşı noyabrın 26-da Nardaranda xüsusi əməliyyat zamanı həbs edilib və konstitusiya quruluşunu devirməyə cəhddə və bir çox digər ağır cinayətlərdə ittiham olunub. -06D-