Taleh Bağırzadə təcridxanada özbaşınlıqların olduğunu bildirib

Oktyabrın 21-də Bakı Ağır Cinayətlər Məhkəməsində “Müsəlman Birliyi” hərəkatının həbsdə olan sədri Taleh Bağırzadə, AXCP sədri Fuad Qəhrəmanlı və digərlərinin cinayət işi üzrə növbəti məhkəmə iclası keçirilib.

Turan agentliyinin məlumatına görə, hakim Əlövsət Abbasovun sədrliyi ilə keçirilən proses zamanı  çıxış edən Abbas Hüseynov təcridxanada özbaşınlıqların olduğunu bildirib. “Bu gün məni karsdan çıxarıb gətirməmişdən yarım saat əvvəl 5-6 nəfərin döyülüb, söyüldüyünü gördüm. Onlara hətta işgəncə də verirlər. Elə bil bu dövlətin qanunu, yiyəsi yoxdu.İnsan haqları hara baxır? Biz orada erməni əsirliyində yaşamış kimiyik. Sanki dərədbəylikdi. O insanalrın yiyəsi yoxmuş kimi davranırlar. Adamlara zülm eləmək insana yaraşan hərəkət deyil. Bilirəm deyəcəksiz ki, bu məsələnin burada baxılan işə aidiyyəti yoxdu. Ən azı, insan kimi bu məsələyə biganə qalmayın. Müraciət edin ki, adamlara zülm eləməsinlər. O insanlar yazıqdı, bizim vətəndaşlarımızıdır.”

Təqsirləndirilən şəxslər deyir ki, üstündən 11 ay keçməsinə baxmayaraq, işgəncə izləri hələ də bədənlərində qalır. Həmin izləri ekspertə göstərsələrdə, o qeydə almaqdan imtina edib.

Ababs Hüseynov deyir ki, “İşgəncələrdən sonra başımda şiş əmələ gəlib. Müalicə Müəssisəsind tomoqrafiya avadanlığı olmadı ki, bunun nə şiş olduğunu, nədən əmələ gəldiyini müəyyənləşdirsinlər. Ekspertə şişi, başqa xəsarət izlərini göstərirəm qeydə almaq istəmir. Ona dedim ki, ağsaqqal adamsan gördüyünü niyə danırsan?”

Daha sonra Hacı Tale bildirib ki, “bandotdeldə olark’n  burnumu sındırdılar». “Amma ekspert burnumdakı sınığı qeydə almaqdan imtina edir. Deyirəm ki, burnum sınıb, nəfəs ala bilmirəm. Soruşur ki, hardan bilirsən burnunun sındığını. Halbuki burnumun sındığı elə kənardan da görünü”.

Vəkillər deyir ki,  təqsirləndirilən şəxslərin məhkəmədə söylədiklərindən sonra ekspertizanın rəyini bəri başdan şübhə altına almağa ciddi əsaslar var.

İclasda çıxış edən vəkillər isə Baş Mütəşəkkil Cinayətkarlıqla Mübarizə İdarəsinin əməkdaşı İbrahim Kazımovun yenidən məhkəməyə çağrılıb, dindirilməsini istəyiblər. Onlar zərərçəkmiş kimi tanınan İ. Kazımova bəzi suallar vermək istədiklərini deyiblər.

Prokuror isə deyib ki, İ. Kazımov iki dəfə məhkəmədə ifadə verib və hər şeyi danışıb. Təqsirləndirilən Cabbar Cabbarov isə ona “Siz dövlət ittihamçısınız yoxsa vətən xaini?” sualını verib. Bu prokurorun narazılığına səbəb olub. Hakim tərəfləri sakitləşdirərərək vəsatətə sonrakı iclaslarda münasibət bildirəcəyini deyib.

Daha sonra prosesdə şahid qismində Sabunçu rayon polis  İdarəsinin əməkdaşları Vəliyev Nadir, Orucov Cabbar, Hüseynov Eyvaz, Cabbarov Cavid, Məhərrəmov Ruslan və Ələkbərli Ağaəli ötən il noyabrın 5-də Müsəlman Birliyi Hərəkatının sədr müavini Elçin Qasımovun azadlığa buraxılması tələbi ilə idarənin qarşısında keçirilən aksiya ilə bağlı ifadə veriblər. N. Vəliyevdən sonra şahid kimi dindirilən Ş. Orucov isə deyib ki, ondan əvvəl məhkəmə iclasında ifadə verən N. Vəliyevin necə ifadə verməsini eşidib. Vəkillər isə onun şahidlik statusuna xitam verilməsini istəyiblər. Məhkəmə onun statusuna xitam verib.

İclasda şahid kimi ifadə verən Sabunçu RPİ-nin əməkdaşı Ağaəli Ələkbərli isə ötən il noyabrın 5-də baş verən hadisələr zamanı təqsirləndirilən şəxslərdən Zakir Mustafayevi gördüyünü deyib. Z. Mustafayev isə həmin gün orada olmadığını söyləyib. Bundan sonra vəkillər dəqiqləşdirmə aparıblar. Şahid tarixləri səhv saldığını deyib. O, ifadəsində göstərib ki, həmin hadisələr zamanı saxlanılan şəxslərə işgəncə verilməyib və saxlanılan şəxslərdən beşbarmaq və bıçaq aşkar edilib. Bu zaman Taleh Bağırzadə ona “Yalan deyənin atasına lənət” deyib: “ ”Skoç Ədalət” kimi tanınan şəxs və digərləri mənim cibimə narkotik atıb tutmuşdular. Necə ki, ilahiyyatçını narkotiklə şərləyib tutublar, eləcə də oradıklardan bıçaq və beşbarmaq çıxmasını deyirlər. Hamısı polislərin işi olub. Mən qurana da and içərəm ki, bu adam işgəncələrin şahidi olub, lakin danır. Əmin olun bir gün ədalətli məhkəməyə çıxacaqsınız. Siz elə danışırsınız elə bil polislər məsumdur. İlham Əliyev deyib ki, polislər nə etsə tutmayacaqlar. İlham Əliyev sizə o ixtiyarı verib. Polis binalarının işgəncə məkanı olmasını hamı bilir. Mənim özümə Sabunçu rayon Polis İdarəsində işgəncə verilib. Mən əminəm ki, siz işgəncələrə şahid olub gizlədirsiniz. İlham Əliyev sizin arxanızda dayanıbsa, bilin ki, bizim də arxamızda Allah dayanıb”. Hakim Ə. Abbasov isə T. Bağırzadəyə deyib ki, prezidentin adını çəkmək olmaz. T. Bağırzadə isə ona “Polislər Mehriban Əliyevanı söyəndə səsiniz çıxmırdı. İndi səsiniz bizə çıxır?” cavabını verib.

Daha sonra Abbas Hüseynov çıxış edərək deyib ki, Milli Məclisdə təhsildən, siyasətdən,Qarabağdan danışmaq əvəzinə dini azadlığı boğmaq üçün yollar axtarırlar və bu onu narahat edir: “Qüdrət Həsənquliyev və onun kimi qeyrətsizlər dini azadlığın məhdudlaşdırılmasından danışırlar. Nə qədər də etsəniz murdar niyyətinizə nail ola bilməyəcəksiniz. Bu bir başa İlham Əliyev və digərləri tərəfindən təşkil olunur”.

Hakim isə deyib ki, məhkəmə Milli Məclisin işinə qarışa bilməz.

Məhkəmə prosesi   oktyabrın 24-də davam edəcək. –36С--