Tofiq Yaqublu doqquzuncu gündür aclığı davam etdirir

Bakı/10.09.20/Turan: Müxalifətçi Tofiq Yaqublu 9-cu gündür 3 saylı Şüvəlan İstintaq Təcridxanasında aclığı davam etdirir.

Bu gün Yaqublunun ailə üzvləri ilə görüş günüdür, amma İstintaq Təcridxanasında görüşə maneə yaradılır, bu barədə siyasətçinin qızı Nigar Həzi bildirib.

“Bizə deyirlər ki, ailə üzvləri tək-tək görüşə bilərlər. Bu, koronavirusa yoluxma riski ilə əsaslandırılır. Amma, axı ünsiyyət zamanı şüşə arakəsmə olur, hansı yoluxmadan söhbət gedə bilər?

Atam 9-cu gündür aclıq edir, o, gücsüz və halsızdır. Ailə üzvləri ilə ayrı-ayrılıqda görüşmək iqtidarında deyil.

Biz İstintaq Təcridxanasının rəisi ilə görüşmək istədik, bizi onun yanına da buraxmırlar”, deyə Həzi bildirib.

Müsavat Partiyasının qərargah-mənzilində Yaqublu ilə həmrəylik əlaməti olaraq 4 fəalın aclıq aksiyası davam edir.

Bu gün 9-cu gündür aclıq edən AXCP üzvü Tofiq Məmmədovun vəziyyəti pisləşib. Dünən ona “təcili yardım” çağırılıb, bu barədə aksiyanın digər iştirakçısı, 3 gündür aclıq edən Müsavat Partiyasının Gənclər Təşkilatının sədri Elman Quliyev bildirib.

Müsavat Partiyasının başqanı Arif Hacılı çox sayda aksiyaya qoşulmaq istəyənlərin olduğunu bildirib. Amma qərargah-mənzildə aclıq etmək istəyən hamıya yer çatmır. -06D-