"Uşaq qaynar xətti"ndən isti yardim əli...

AZERCELL PROBLEMİ OLAN UŞAQLARI VƏ VALİDEYNLƏRİ TƏK QOYMUR 

“Səninlə kobud rəftar edirlər? Dərdini heç kimə deyə bilmirsən? Narahatsan? Qorxursan? Onda problemini bizimlə bölüş...” Bu çağırış Azərbaycanda yaşayan bütün uşaqlara ünvanlanıb və burada bir ümid də var: “Bizə zəng et. Yardım telefon qədər yaxındır”. Bu çağırışın müəllifi Uşaq Qaynar Xətt Xidmətidir.

Uşaq Qaynar Xətt Xidməti 16 yaşlı Z.A-nın həyatında da dönüş nöqtəsi yaradıb. Valideynləri xaricdə yaşadığı üçün regionlardan birində əmi-bibi nəzarətində böyüyən yeniyetmə ciddi mənəvi sıxıntılar keçirib. Valideynlərinə, xüsusən də anasına olan ehtiyacı, qohumlarının onu incitməsi yeniyetməni bir dəfə intihara sövq edib. Həyatda qalmağı bacaran Z.A daha sonra xidmətə müraciət edib: ”Biz onunla söhbət zamanı aydınlaşdırdıq ki, atası iş üçün xaricdədir. Anası isə astma xəstəsidir və atasının yanında ona görə qalır ki, oranın havası ona düşür. Uşağı da olduqları yerə aparmaq istəyiblər. Amma o, müəllim yanına getdiyi üçün ali məktəbə qəbul olandan sonra valideynlərinin yanına köçməyə qərar verib. Yaxın qohumları tez-tez “sən valideynlərinə lazım deyilsən” deyərək, onun psixoloji durumunu ağırlaşdırıblar. Özündən böyük bacısı da regionlardan birinə gəlin getdiyi üçün Z.A-ya hamının öz ailəsi ilə yaşadığı halda, onun tək qalması pis təsir edirdi. Biz onunla söhbət zamanı aydınlaşdırdıq ki, valideynləri onunla tez-tez əlaqə saxlayır. Və ali məktəbə daxil olandan sonra onların yanına köçmək şansı var. Hər dəfə bu cür söhbətdən sonra qız başa düşürdü ki, vəziyyət onun düşündüyü qədər də faciəli deyil. Bir ay ərzində 3-4 dəfə danışdıq və o, həyatına başqa cür baxmağa başladı. Hətta, Novruz bayramı zamanı onun yanına gələn anası da qızının bizə müraciət edəndən sonra düzəldiyini öyrənib, təşəkkür üçün bizimlə əlaqə saxlamışdı”. 

Xidmətin rəhbəri Gülşən Cumayeva deyir ki, Azərbaycanda 2010-cu ildən etibarən uşaqların şikayətini dinləməyə başlayıblar. “Ümidli Gələcək” Gənclər Təşkilatı və Azərbaycan Respublikası Təhsil Nazirliyi tərəfindən Azercell Telekom Şirkətinin xüsusi maliyyə və texniki dəstəyi və UNİCEF, “Uşaqların Xilası” və “Dünyaya Baxış” beynəlxalq təşkilatlarının dəstəyilə təsis edilən xidmət 1 fevral 2010-cu il tarixindən etibarən rəsmi fəaliyyətə başlayıb. Hazırda saat 09:00-dan 18:00-dək fəaliyyət göstərən xətt 3 stasionar telefon nömrəyə (012 480-22-80), iki Azercell operatorunun mobil nömrəsinə (050-680-22-80 və 051-880-11-80), 1 Toll-free nömrəsinə (088-480-22-80) habelə e-poçt xidməti (yardim@usaqxetti.az) və internet saytına (www.childhelpline.az) malikdir.X idmətin yaradılmasında məqsəd ailədə zorakılığa məruz qalan, həmyaşıdları ilə problem yaşayan, psixoloji və mənəvi yardıma ehtiyacı olan uşaqlara dəstək olmaq, onlara problemlərinin həllinin tapılmasında, sosial mühitə uyğunlaşmalarına yardım etməkdir. G.Cumayevanın sözlərinə görə, onların fəaliyyətinin əsasını məxfilik prinsipi təşkil edir:”Bura daxil olan bütün zənglərə dair məlumat məxfi saxlanılır. Müraciət edən öz adını, ümumiyyətlə özü haqqında heç bir şəxsi məlumat verməyə bilər. Yalnız ehtiyac yarandıqda və problemin həlli bunu tələb edirsə, müraciət edən buna razılıq verirsə, onun barəsində məlumat müvafiq dövlət və qeyri-hökumət təşkilatlarına ötürülə bilər”.