Vaksinasiya yerlərində koronavirusa kütləvi yoluxma təhlükəsi var

Bakı/05.03.21/Turan: Vaksinasiya üçün TƏBİB-in (Tibbi Ərazi Bölmələrini İdarəetmə Birliyi) təşkil etdiyi onlayn növbə işləmir, bu da insanların kütləvi şəkildə toplaşmasına gətirib çıxarır və kollektiv yoluxma təhlükəsi yaradır. Bu barədə TƏBİB-in randevu.its.gov.az saytından 5 mart saat 11-ə növbə götürmüş iqtisadçı Samir Əliyev bildirib. Təyin edilən vaxtda vaksinasiya yerinə - Xırdalan şəhərindəki 5 nömrəli məktəbə gələn Əliyev mərəkə ilə qarşılaşıb.

200-ə yaxın insan peyvənd vurdurmağı gözləyirdi. S.Əliyevdən yerində növbəyə yazılmağı tələb ediblər və o, həyat yoldaşı ilə birlikdə 221 və 222-ci növbələri götürüb. Həmin vaxta qədər 50 nəfər peyvənd vurdurmuşdu.

S.Əliyev hesab edir ki, xalqa yenilik kimi təqdim edilmiş onlayn növbə işləmir, TƏBİB isə insanları aldadır, koronavirusa yoluxmaq üçün yeni mənbələr yaradır.

TƏBİB-dən Turan-a vəziyyəti şərh edərkən bildiriblər ki, vaksinasiya yerlərində sıxlığı onlayn növbə götürməyən, habelə müəyyən edilmiş vaxtdan əvvəl və ya sonra gələn vətəndaşlar yaradır.

Əməkdaşlar müəyyən edilmiş vaxtdan kənar saatlarda gələn yaşlılara peyvənd vurmaqdan imtina etmirlər. TƏBİB-dən əlavə ediblər ki, vətəndaşların elektron növbədən istifadə etməsində israr edirlər, onlayn qeydiyyatdan keçməyi bacarmayanlar isə kömək üçün yaşadıqları yer üzrə poliklinikaya müraciət edə bilərlər. -0-