Vəfa Quluzadə vəfat edib (video)

Azərbaycanın görkəmli dövlət xadimi, istedadlı Azərbaycan diplomatlarından biri Vəfa Quluzadə dünyasını dəyişib. Mayın 1-də axşam Vəfa Quluzadənin vəziyyəti pisləşib və onun həyatını xilas etmək mümkün olmayıb.

 Vəfa Quluzadə 1940-cı il dekabrın 21-də Bakıda şərqşünas alim Mirzağa Quluzadənin və yazıçı, Azərbaycan və Türkiyə ədəbiyyatı üzrə mütəxəssis Yaqud Dilbazinin ailəsində anadan olub.

1963-cü ildə V.Quluzadə Azərbaycan Dövlət Universitetinin şərqşünaslıq fakultəsini bitirib. 1962-64-cü illərdə SSRİ Elmlər Akademiyasının Şərqşünaslıq İnstitutunda təhsilini davam etdirib, filologiya elmləri namizədi elmi dərəcəsini almaq üçün dissertasiya müdafiə edib.

V.Quluzadə diplomatik karyerasına 1970-ci ildə Misirdə SSRİ səfirliyinin attaşesi vəzifəsində başlayıb. Həmin dövr ərəb-İsrail müharibəsi illəri və müharibəsonrası sülh danışıqları illəri idi və V.Quluzadə Misir prezidenti Ənvər Səadət və SSRİ xarici işlər naziri Andrey Qromıkonun görüşlərində iştirak edib.

1970-ci illərin ortalarından 1980-ci illərin sonlarına qədər Quluzadə Azərbaycanın partiya orqanlarında işləyib, AKP MK-nin mədəniyyət şöbəsinin rəhbəri olub.

 1990-cı illərdə Əlcəzairdə diplomatik fəaliyyət göstərən V.Quluzadə Azərbaycanın birinci prezidenti Ayaz Mütəllibovun xarici siyasət məsələləri üzrə onun müşaviri vəzifəsini tutmaq təklifini qəbul edib. O, ölkənin sonrakı prezidentləri – Əbülfəz Elçibəy və Heydər Əliyevin dövründə də bu vəzifədə qalıb.

1999-cu ilin sonlarında istefa etdiyi ana qədər o, Azərbaycan Təhlükəsizlik Şurasının tərkibinə daxil olub.

Bütün bu müddət ərzində Vəfa Quluzadə Azərbaycanın xarici siyasətini işləyib hazırlayanlardan və həyata keçirənlərdən biri olub. O, Dağlıq Qarabağda münaqişənin nizamlanması üzrə danışıqlarda fəal iştirak edib. Azərbaycan-Ermənistan danışıqlarında Azərbaycan nümayəndə heyətinə rəhbərlik edib, ATƏT sammitlərində, Cenevrə (1984) və İstanbulda (1986) beynəlxalq konfranslarda danışıqlar aparıb, NATO sessiyalarında iştirak edib.

V.Quluzadə yüksək peşəkarlığı, fitri ziyalılığı, sadəliyi və təvazökarlığı, səmimi vətənpərvərliyi ilə fərqlənirdi.

Turan agentliyi mərhumun doğmalarına və yaxınlarına dərin başsağlığı verir.

 Allah rəhmət eləsin