Azad Həsənov
Vəkil: �6 şahidə, 2 vəsatətə görə Müsavat Partiyası fəalının məhkəməsi 180 gündür davam edir�
Bakı/15.07.19/Turan: İyulun 15-də Bakı Ağır Cinayətlər Məhkəməsində hakim İradə Həsənovanın sədrliyi ilə Müsavat Partiyasının fəalı Azad Həsənova qarşı cinayət işi üzrə məhkəmə prosesi yenidən iyulun 22-dək təxirə salınıb.
Hakim bildirib ki, məhkəmənin təxirə salınmasına səbəb Bakı Şəhər Baş Polis İdarəsinin məhkəmənin sorğusuna hələ cavab verməməsidir.
Vəkil Osman Kazımov məhkəməyə etirazını bildirərək deyib ki, 6 şahidin dindirilməsinə və 2 vəsatətə görə müxalifət fəalının məhkəməsi artıq 180 gündür davam edir. O, polis idarəsinin məhkəmənin sorğusuna məhəl qoymadığını deyib.
"Artıq dördüncü dəfədir ki, Bakı Şəhər Baş Polis İdarəsi məhkəmənin sorğusuna cavab vermir. Sorğu Polis İdarəsinin qeydiyyat kitabından çıxarışla bağlıdır. Çünki cinayət işinə hal şahidlərinin siyahısı daxil edilib. Amma Polis İdarəsinin qeydiyyat kitabında hal şahidlərinin adı yoxdur. Azad Həsənov məhkəmədə ifadə verərkən bildirib ki, Bakı Şəhər Baş Polis İdarəsində olarkən orada hal şahidləri olmayıb. Bu səbəbdən də Polis İdarəsi qeydiyyat kitabından çıxarış verməkdən imtina edir", - vəkil qeyd edib.
Milli Strateji Düşüncə Mərkəzinin rəhbəri İsa Qəmbər isə jurnalistlərə ölkədə məhkəmə islahatları ilə bağlı deyilənlərin yalan olduğunu bildirib.
"Bu il aprelin 4-də məhkəmə və hüquq sistemində islahatlarla bağlı İlham Əliyevin sərəncamı olub. Orada qəşəng-qəşəng maddələr yazılıb. Hamısından sonra da yazır ki, bu, iki ay, üç ay, altı ay ərzində hazırlansın və təqdim olunsun. Müddətin üç ayı keçib, məhkəmədə hər hansı bir islahat aparılıbmı? Əlbəttə, bu cür sifarişlə işləyən məhkəməyə nəinki hakimiyyətin özündən, hətta polsindən də sayğı, tabeçilik olmayacaq. Bu, məhkəmənin günahıdır. Məhkəmə bu cür dişsiz, mənasız, yuxarıdan gələn sifarişlə fəaliyyət göstərməsə idi, polis də bu cür saymamazlıq edə bilməzdi", - o qeyd edib.
Azad Həsənov Cinayət Məcəlləsinin külli miqdarda narkotik maddənin qanunsuz dövriyyəsi maddəsi ilə ittiham olunur. O 2014-cü ildən Litvada mühacirət həyatı yaşayıb. Ağır xəstə olan atasını görmək məqsədilə 2018-ci il oktyabrın 11-də Bakıya gəlib. Elə həmin gün atasının yaşadığı Hövsan qəsəbəsində Bakı Şəhər Baş Polis İdarəsinin əməkdaşları tərəfindən saxlanılıb.
A.Həsənov 2003-cü ildən Müsavat Partiyasının üzvüdür.
Müsavat Partiyası onun həbsinin siyasi motivli olduğunu bəyan edib.
Ancaq Azərbaycan rəsmiləri ölkədə insanların siyasi baxışlarına görə həbs edilməsinə dair iddiaları qəbul etmirlər.-03C-
-
- İqtisadiyyat
- 15 İyul 2019 16:40
Cəmiyyət
-
Oktyabrın 24-də “Qarabağ” klubu Avropa Liqasının əsas mərhələsinin ev oyununda Hollandiyanın məşhur “Ayaks” klubuna 0:3 hesabı ilə uduzub.
-
Qəmər adaları vətəndaşı Məhəmməd Əhməd və Azərbaycan vətəndaşı Pərviz Quliyev Azərbaycanda "Qırmızı kitab"a düşən şahinləri ovladıqlarına görə saxlanılıblar.
-
Oktyabrın 25-də Bakıda və Abşeronda hava dəyişkən olacaq. Gün ərzində Abşeronun bəzi yerlərində yağış yağa bilər. Şimal-qərb küləyi əsəcək.
-
Oktyabrın 21-22-si Bakıda yağış bir sıra problemlərlə yanaşı, insan faciəsinə də yol açdı. Sabunçu rayonu ərazisində subasmaya məruz qalmış tuneldə iki şəxs həyatını itirdi. Halbuki Bakıda seldən ölüm halları yaxın tarixdə baş verməmişdi.
Rəy yaz