Vəkil Fərəc Kərimovla görüşə bilmir

“Məhkəmənin qərarında açıq yazılıb ki, Fərəc Kərimovun həbsinin icrası 1 saylı Bakı İstintaq Təcridxanasına  tapşırılır. Məhkəmənin qərarına baxmayaraq, Fərəc Kərimov hələ də Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin saxlama kamerasında saxlanılır. Bu, qanun pozuntusudur”,- vəkil Nemət Kərimli Turan-a bildirib.

Müsavat Partiyası Gənclər Təşkilatının sədr müavini və Facebook fəalı Fərəc Kərimov iyulun 23-də saxlanılıb. Ona qarşı Cinayət Məcəlləsinin 234.4.3-cü (qanunsuz olaraq satış məqsədilə böyük ölçüdə narkotik maddə əldə etmək və ya saxlamaq) maddəsi ilə ittiham irəli sürülüb.

F. Kərimovun qardaşı Sirac Kərimov da iyulun 17-də eyni ittihamla saxlanıb.   

İyulun 24-də Nərimanov Rayon Məhkəməsi Fərəc Kərimovun barəsində 3 ay müddətinə  həbs qətimkan tədbiri seçib.

Vəkil dəfələrlə müraciət etməsinə baxmayaraq, işi aparan müstəntiqlə və F Kərimovla görüşə imkan yaradılmayıb.  “İyulun 25-də yenidən görüş üçün müraciət etmişəm. Amma ndiyədək görüş verilməyib”, - o qeyd edib.  

N.Kərimli bildirib ki, qeyri-rəsmi məlumatlara görə,  hər iki qardaşa işgəncə verilir. “Sirac Kərimovla bağlı iyulun 17-də DİN Baş Mütəşəkkil Cinayətkarlıqla Mübarizə İdarəsinə təcili yardım çağırılması barədə məlumatım var”, -o qeyd edib.

Vəkil həmçinin İşgəncələrə Qarşı Komitənin sədri Elçin Behbudova məlumat verib.

Öz növbəsində Elçin Behbudov Turan-a bildirib ki, iyulun 26-da gün ərzində Fərəc və Sirac Kərimovlarla görüşməyə cəhd edəcək.-03B-