Vətəndaş cəmiyyətinin fəalları ATƏT PA-nı Bakıya təsir göstərməyə çağırıblar

Fevralın 13-də Vyanada açılan ATƏT PA-nın qış sessiyası ərəfəsində Azərbaycanın vətəndaş cəmiyyətinin  50-dən çox fəalı assambleya üzvlərinə müraciət edərək ölkədə insan hüquqları ilə bağlı vəziyyəti müzakirə etməyə çağırıb.

Müraciətdə qeyd olunub ki, iyunun 28-də Bakıda ATƏT-in Parlament Assambleyasının illik toplantısı Azərbaycanda insan hüquqları probleminin həllinə müsbət töhfə verəcək. 

Bununla əlaqədar müraciət müəllifləri Azərbaycanda fundamental  azadlıqların - söz, toplaşma, assosiasiya – pozulduğunu, jurnalistlər, blogerlər, hüquq müdafiəçiləri, gənc fəallar, siyasətçilərin uydurma ittihamlarla həbsə alındığını bildiriblər.

Buna  nümunə kimi  hüquq müdafiəçisi Anar Məmmədli,”Respublika alternativi» (ReAl) hərəkatının rəhbəri İlqar Məmmədov, Müsavat Partiyası sədrinin müşaviri Yadigar Sadıqov, NİDA hərəkatının yeddi fəalı, jurnalistlər Hilal Məmmədov və Tofiq Yaqublu, İlahiyyatçı Taleh Bağırovun həbsi göstərilib.

Bundan əlavə, 2007-ci ildə Bakının və regionların mərkəzində toplaşma azadlığına qoyulan qadağa davam edir. Razılaşdırılmamış və ya spontan aksiyaların qarşısı polis tərəfindən amansızcasına alınır, iştirakçılar cərimə olunurlar.  

Bundan əlavə, son illər QHT haqqında qanunvericilik pisləşib. 2013-cü ilin dekabrında parlament yerli və xarici QHT-lər üçün ciddi maneələr yaradan düzəlişləri təsdiq edib. Belə ki, kiçik texniki səhvlərə görə QHT-lər böyük cərimələrə məruz qala bilər. Bundan əlavə, Ədliyyə Nazirliyinə və digər dövlət strukturlarına QHT-lərin gündəlik fəaliyyətinə müdaxilə etmək,  onları cərimələmək, qeydiyyatını ləğv etmək hüququ  verilib.

Azərbaycan hakimiyyətinin dözümsüzlük göstərdiyi fundamental azadlıqlarından biri azad seçki hüququdur. Son 5 ildə seçki qanunu durmadan pisləşib.

2009-cu ildə bir şəxsin 2 ildən artıq müddətə prezident seçilməsinə məhdudiyyətin ləğvi ilə yanaşı seçki qanunvericiliyinə ədalətli seçkilərin mümkünlüyünü məhdudlaşdıran mürtəce düzəlişlər edilib.

2013-cü il 9 oktyabr seçkisində İlham Əliyev üçüncü müddətə prezident elan edilsə də bir çox yerli və beynəlxalq təşkilatlar azad və ədalətli seçkilərin keçirilməsi üçün kifayət qədər şəraitin olmadığını bildiriblər.

Seçkilərdən sonra onun yekunlarına dair tənqidi rəy verən Seçki Monitorinqi və Demokratiyanın Tədrisi Mərkəzinə qarşı kampaniya başlayıb. Təşkilata qarşı cinayət işi qaldırılıb, onun rəhbəri Anar Məmmədli həbs edilib.

ATƏT DTİHB-nin müşahidə missiyası hakimiyyətin haqsız tənqidlərinə məruz qalıb.

Sonda Azərbaycanın insan hüquqları sahəsində beynəlxalq öhdəliklərini nəzərə almaqla ATƏT PA-ya müraciət edilir. Müraciətdə  ölkənin Avropa Şurası Nazirlər Komitəsinin sədrliyi və ATƏT PA-nın Bakıda illik toplantısı (may 2014-cü il) ərəfəsində hakimiyyəti uydurma ittihamlarla həbs edilənləri dərhal azad etməyə, söz, toplaşma, ifadə, birləşmə azadlığını təmin etməyə, azad və ədalətli seçkilər üçün şərait yaratmağa çağırmaq xahiş olunur

Müraciəti Azərbaycanın vətəndaş cəmiyyətinin nümayəndələrindən ibarət böyük qrup imzalayıb.06D-