Xədicə İsmayılın həbsi ictimai xadimləri qəzəbləndirib

Azərbaycanın tanınmış ictimai xadimləri araşdırmaçı jurnalist Xədicə İsmayılın həbsini pisləyən bəyanatlarla çıxış ediblər.

“Xədicə İsmayıl hansısa intihar halına görə yox, jurnalist fəaliyyətinə görə həbs edilib”, deyə Neftçilərin Hüquqlarını Müdafiə komitəsinin sədri Mirvari Qəhrəmanlı Turan-a bildirib.

M.Qəhrəmanlı jurnalisitin həbsini əsassız hesab edir. “Əgər intiharla bağlı həbslər varsa, sosial, hüquqi ədalətsizliyə görə təkcə metronun “Koroğlu” stansiyası yaxınlığındakı körpüdən özünü atmaqla neçə-neçə intihar anonsları olub, işdən azad edilməsilə bağlı özünü asan insanlar olub, inidyə kimi kimi həbs ediblər ki, X.İsmayılı həbsə alırlar?” - deyə M.Qəhrəmanlı mövqeyini bildirib. O, X.İsmayıla bu münasibəti hakimiyyətin ayrı-seçkiliyi kimi dəyərləndirib.

M.Qəhrəmanlı bir nəfər şəxsin sözü ilə, hər-hansı araşdırma aparılmadan, təhqiqat getmədən kimisə intihara təhrik etməkdə günahlandırmağı hüquqdan kənar addım adlandırıb. “Bu həbslə hakimiyyət növbəti dəfə beynəlxalq tənqidi Azərbaycana yönəldir, növbəti dəfə ölkəni və xalqı tənqid hədəfinə gətirir, bu isə yolverilməzdir, nəticə etibariləAzərbaycana qarşı arzuolunmaz tədbirlərə əl atılması ilə başa çata bilər”, deyə hüquq müdafiəçisi bəyan edib.

Milli Şuranın üzvü Gültəkin Hacıbəyli bildirir ki, Xədicə İsmayıl guya kişi cinsindən olan bir şəxsi özünü öldürmə həddinə çatdırdığına görə həbs olunub. “Tural Mustafayev adlı bu şəxs bir dəfə evli olub, psixoloji problemlərinə görə boşanıb. Sonra nişanlanıb, nişanlısı onun psixikasında ciddi problemlər olduğu üçün nişanı qaytarıb və bu barədə mətbuata geniş müsahibə verib. Adam Maştağa ruhi dispanserində uzun müddət müalicə alıb, öz maşınına od vurub yandırıb və s. Guya intihar etmək istəyəndə də bunu hamının gözü qarşısında Milli Parkda edib, qatıqla qarışdırıb mərgümüş (siçan dərmanı) içib. Qatıq və südün mərgümüşün təsirini ən azı iki dəfə azaltdığını bilə-bilə. Yəni, bu, bir şou idi. Hamıya da bunu keçmiş nişanlısına görə etdiyini deyib. Yəni, bu şou qızı geri qaytarmaq üçün olub. Sadəcə, hüquq-mühafizə orqanlarının əlinə Turalın gündəliyi keçib və orada onun intim həyatı ilə bağlı bəzi faktlar olub ki, bu barədə Xədicə özü məhkəmədə danışacaq. Xədicə məhz bu faktları açıqlayıb Turalı rüsvay etmək istəmədiyi üçün bu işlə bağlı prokurorluğa çağırıldığını ictimailəşdirmirdi. Turalı yəqin elə bu faktlarla şantaj ediblər, zəif, xəstə psixikalı adamları təsir altına salmaq və qorxutmaq çox asandır. Və beləcə, Xədicə İsmayıl olub “dövlət sirrini yaymaqla şəxsi intihar həddinə çatdıran!”, deyə G.Hacıbəyli qeyd edir.

Tanınmış hüquqşünas Aslan İsmayılov Facebook səhifəsində yazır ki, münasibətlərindən asılı olmayaraq, Xədicə İsmayılın həbsini və ölkədə gedən bu susdurma tendensiyasını qətiyyətlə pisləyir. “Həbs edilənlərin kimliyindən asılı olmayaraq, baş verənlər böyük təhlükələrdən xəbər verir və əmin olun ki, heç kimdən yan keçməyəcək”.

Şərq-Qərb Araşdırmalar Məhkəzinin rəhbəri Ərəstun Oruclu jurnalistin həbsinin çox pis anons olduğunu bildirir. “Bu həbs dövlətin siyasətini müəyyən etdiyini, onun inkişaf strategiyasını qurduğunu iddia edənlərin əslində nə qədər kiçik hisslərlə yaşadığını, hansı cılız işlərlə məşğul olduqlarını bütün çılpaqlığı ilə ortaya qoydu. Azərbaycan dövlətinin hər tərəfdən və hər sahədə sürətlə böhrana yuvarlandığı bir vaxtda onların ən təxirəsalınmaz tədbiri bu imiş”, deyə o Fasebook səhifəsində yazır. -0-