«Yeni siyasi konfiqurasiyaya» müxtəlif baxışlar

Bakı/29.07.21/Turan: 2020-ci ildə Azərbaycanda iqtidarla müxalifətin arasında siyasi dialoqun yeni mərhələsinin başlanması elan olunub. Prezident Administrasiyasının Siyasi partiyalar və qanunvericilik hakimiyyəti ilə iş şöbəsinin müdiri Ədalət Vəliyev 49 siyasi partiya rəhbəri ilə görüş keçirib. Görüş zamanı o, bildirib ki, iqtidar-müxalifət dialoqu bütün digər məsələlərlə yanaşı, ilk növbədə, dövlətin inkişafına xidmət etməlidir.

Həmin proses adlandırılıb.

Yalnız iki partiya – Azərbaycan Xalq Cəbhəsi Partiyası və Müsavat Partiyası həmin siyasi konfiqurasiyada iştirak etmir.

Bəs bir ildən çox davam edən bu iqtidar-müxalifət dialoqunun hər hansı ictimai-siyasi nəticələri varmı? Cəmiyyət onları hiss edirmi?

2020-ci ilin martın 19-da Prezident İlham Əliyev Novruz bayramı ilə bağlı öz təbrik çıxışında bildirib ki, Prezident Administrasiyası bütün siyasi partiyalara dialoq təklifi etmişdir. «Bu da çox ciddi addımdır. Sirr deyil ki, bu gün Azərbaycan iqtidarı tarixdə olmadığı qədər güclüdür. Biz hesab edirik ki, güclü ilk addımı atmalıdır, ilk təklifi verməlidir və belə demək mümkündürsə, yolunu azmışlara da yol göstərməlidir. Yəni, biz bunu etdik və şadam ki, siyasi spektrin mütləq əksəriyyəti bu təşəbbüsə müsbət reaksiya vermişdir, faktiki olaraq siyasi dialoq artıq başlamışdır. Əminəm ki, bunun nəticələri də xalqımız üçün və ölkəmizin gələcək inkişafı üçün müsbət olacaqdır». 

Milli Məclisin Hüquq Siyasəti və Dövlət Quruculuğu komitəsinin üzvü, Ana Vətən Partiyasının sədri Fəzail Ağamalı Turana bildirib ki, iqtidar-müxalifət münasibətlərinin normal müstəvi üzərində davam etməsi cəmiyyətin uğuru hesab olunur. «Bu, artıq siyasi mühitin sabitliyi və eyni zamanda yüksək siyasi mədəniyyətin formalaşması deməkdir. Bu baxımından ölkə Prezidentinin həyata keçirmiş olduğu genişmiqyaslı islahatlar içərisində siyasi islahatlar da əhəmiyyətli yer tutur».

Deputat qeyd edib ki, yeni siyasi konfiqurasiyanın yaradılması və inkişafı üçün ciddi addımlar atılmaqdadır. «Artıq Milli Məclisdə olan müxalifət partiyaları parlamentin rəhbərliyində təmsil olunur. Eyni zamanda islahatlar nəticəsində Prezident Administrasiyasında yeni Siyasi partiyalar və qanunvericilik hakimiyyəti ilə iş şöbəsinin yaradılması və ora kifayət qədər cəmiyyətimizdə müsbət imici olan Ədalət Vəliyevin gətirilməsi pozitiv rol oynadı».

Onun sözlərinə görə, artıq Milli Məclisdən kənar fəaliyyət göstərən siyasi partiyalarla da kommunikasiyalar qurulub, onlar ən müxtəlif layihələrdə iştirak edir. «İki partiya – AXCP və Müsavat istisna olmaqla bütün partiyalar videokonfranslardan tutmuş ta ki işğaldan azad olunmuş torpaqları ziyarətinə qədər bütün tədbirlərdə iştirak edir. Ümidvaram ki, bundan sonra da siyasi dialoq öz müsbət nəticəsini verəcək».

F.Ağamalı vurğulayıb ki, 44 günlük müharibə dövründə də bütün siyasi partiyalar dövlətin, Ali Baş komandanın, ordunun yanında oldu  və bununla bağlı bəyanat imzalandı. «Bu da aparılan dialoqun çox müsbət tərəflərindən biridir».

Komitə üzvünün fikrincə bundan sonra da siyasi partiyalar öz nizamnamələri və səlahiyyətləri çərçivəsində Azərbaycan torpaqlarında aparılan quruculuq işlərində iştirak edə biləcəklər. «Bərpa işlərini müşahidə edib ona öz fikirlərini ifadə edə bilərlər. Əgər nöqsan varsa, onu da göstərə bilərlər. Eyni zamanda dövlətimizin atılmış addımları təqdir oluna bilər».

O, bildirib ki, ümumiyyətlə aparılan dialoq öz müsbət nəticəsini verməkdədir və bundan sonra da daha müsbət konkret nəticələr əldə olunacaq.

Politoloq Nəsimi Məmmədli isə hesab edir ki, baş verənlər dialoq deyil.

O bildirib ki, dialoq konkret olaraq hər hansı problemin həllinə yönəlik müxtəlif baxışların masaya yatırılaraq müzakirə edilməsi və onların həll yollarının tapılması olmalıdır. «Amma burada əsasən hakimiyyət nümayəndəsi ayrı-ayrı siyasi partiyaların rəhbərlərini dəvət edir, onların şəxsi problemləri, onların maraqlandığı məsələlərlə bağlı söhbətlər edirlər».

Ekspert qeyd edib ki, cəmiyyət üçün bu söhbətlər açıq deyil. «Yəni, bunun təfərrüatı bəlli deyil ki, bu söhbətlər konkret olaraq hansı məsələləri əhatə edir. Gprüşlərdə sosial məsələləri, iqtisadi məsələləri və yaxud humanitar problemlərlə və ya Qarabağ problemi ilə bağlı müzakirələr gedir? Bu bəlli deyil. Ona görə də bu danışıqları dialoq adlandırmaq mümkün deyil».

N.Məmmədli hesab edir ki, bu danışıqların cəmiyyət üçün heç bir təsiri yoxdur. «Çünki həmin görüşlərdən sonra heç bir pozitiv dəyişikliklər də gözə dəymir». -0-