Yunis Səfərov Elmar Vəliyevə qarşı sui-qəsdin səbəb və motivləri barədə

Bakı/04.11.20/Turan:  Noyabrın 3-də Bakı Ağır Cinayətlər Məhkəməsində “Gəncə işi” üzrə məhkəmə prosesində əsas fiqur Yunis Səfərovun, həmçinin digər təqsirləndirilən şəxslər -Firudin Zeynalov və Ceyhun Qurbanovun ifadələri dinlənilib.

F.Zeynalov ondan qandalların çıxarılmasını xahiş edib. Lakin sədrlik edən hakim Əfqan Hacıyev bildirib ki artıq əvvəlki iclasda bu məsələ ilə bağlı qərar qəbul edilib.

F.Zeynalov bildirib ki, Gəncənin keçmiş icra başçısı Elmar Vəliyevə sui-qəsd zamanı o, başqa bir iş üzrə cəza çəkib və Y.Səfərovla əvvəllər tanış olmayıb.

Ceyhun  Qurbanov Y. Səfərovla uzaq qohum olduğunu bildirib, lakin onunla çox söhbət etmədiyini qeyd edib. 

Daha sonra Yunus Səfərov ifadə verib. O ifadəsində E. Vəliyevin vurulmasına səbəb və məqsədlərdən danışıb. O bu hadisəni Dağlıq Qarabağ ətrafında gedən müharibə ilə əlaqələndirib və müqayisə aparıb. Belə ki, o göstərib ki, Azərbaycan öz torpaqlarını qaytarmaq üçün əvvəlcə beynəlxalq təşkilatların köməyindən istifadə etməyə cəhd edib. Lakin beynəlxalq təşkilatlar, böyük dövlətlər bu problemi həll edə bilməyib, nəticədə Azərbaycan müharibə variantına əl ataraq işğal altında olan torpaqlarını azad etməyə çalışıb. 

Gəncədə insanlara zülm edən icra başçısı barədə də yuxarı dövlət qurumlarına şikayətlər edilir, bu şikayətlər səmərə vermədikdə vətəndaş başqa alternativ yollara əl atır, özü E. Vəliyevi cəzalandırmaq niyyətinə düşür. 

Gəncədə E. Vəliyevin qanunsuz, haqsız hərəkətləri daha çox olub. “Mən uzun illər Moskvada yaşamışam, lakin mətbuatda, İnternetdə Gəncədə və Azərbaycanda baş verən hadisələri izləyirdim. E. Vəliyevin qanunsuzəməllərinin qarşısı yuxarı dövlət qurumları tərəfindən alınmadıqda onun qanunsuz əməllərinin qarşısının alınması üçün müxtəlif yollar və variantlar fikirləşməyə başladım. Çünki bu cür qanunsuz hərəkətlər edən icra başçısı cəzasını almalıdır. Bu problemlər qanun çərçivəsində həll olunmadığına görə mən bu yola əl atmalı oldum.  Mənə kömək edən olmadığına görə minimum iş görə bildim, dövlət qurumlarına siqnal ötürə bildim, ədalət naminə bu işi gördüm”, - Y.Səfərov deyib.

Onun sözlərinə görə, bu hadisəni törətməmişdən öncə 30-40 dəqiqəlik videomüraciət hazırlayıb. “Həmin videomüraciət iş materiallarında var. Orada mən ölkədə baş verən qanunsuzluqlar, haqsızlıqlar barədə danışmışam”, - o deyib.

Növbəti məhkəmə ilcası 5 noyabr saat 14:00-da olacaq.

* 2018-ci il iyulun 3-də Gəncədə şəhərin o zamankı rəhbəri Elmar Vəliyevə qarşı sui-qəsd törədilib. Əslən Gəncədən olan Yunis Səfərov onu və onun cangüdənini yaralayıb.

Bundan sonra sosial şəbəkələrdə iyulun 10-na Gəncə administrasiyasının qarşısında E.Vəliyevin işinə etiraz olaraq aksiya təyin edilib. Həmin gün şəhərdə iğtişaşlar baş verib. İğtişaşlar zamanı iki polis əməkdaşı öldürülüb. Bunun ardınca dindarlar və digər şəxslər arasında kütləvi həbslər başlayıb.  

Həmin hadisələr üzrə 70 nəfərə qarşı cinayət işi qaldırılıb. Müttəhimlər 6 ildən 18 ilədək azadlıqdan məhrum edilib. 10-a yaxın adam şərti olaraq azad edilib.  Y.Səfərov və digər 11 nəfərin məhkəməsi 2020-ci ilin yanvarında başlayıb.—30D-