Zamirə Hacıyeva axtarışa verilib

 Daxili İşlər Nazirliyi (DİN) Beynəlxalq Bankın həbsdə olan sabiq rəhbəri Cahangir Hacıyevin həyat yoldaşına cinayət işi açılması ilə bağlı xəbərləri təsdiqləyib. Bu haqda nazirliyin saytında bildirilir.

Nazirliyin açıqlamasında Baş Mütəşəkkil Cinayətkarlıqla Mübarizə İdarəsinin İstintaq şöbəsində Azərbaycan Beynəlxalq Bankı Açıq Səhmdar Cəmiyyətinə külli miqdarda ziyan vurulması faktına görə başlanmış cinayət işinin istintaqının bəzi epizodlar üzrə başa çatdığı bildirilir.

DİN bildirir ki, istintaq zamanı 2001-2015-ci illərdə Beynəlxalq Bankın rəhbəri olmuş Cahangir Hacıyevin qeyriləri ilə qabaqcadan əlbir olub mütəşəkkil qrup yaratdığı müəyyən edilib.

C.Hacıyevin qulluq mövqeyindən sui-istifadə edərək özünün, ailə üzvlərinin və digər şəxslərin adına kart hesabları açdığı, həmin hesablara külli miqdarda pul vəsaitlərinin köçürülməsini təmin etdiyi bildirilir.

Nazirliyin açıqlamasında iddia olunur ki, C.Hacıyev və digərləri Müşahidə Şurasının qərarı olmadan, bir çox fiziki şəxsin adına 47 milyon 144 min manat krediti rəsmiləşdiriblər. Həmin pulların mənimsənildiyi bildirilir.

Nazirliyə görə, istintaq Beynəlxalq Banka ümumilikdə 211 milyon 597 min manat məbləğində ziyan vurulmasına şübhələr üçün əsaslar müəyyən edib.

Qeyd edilən epizodlar üzrə C.Hacıyevə və digər 7 şəxsə Cinayət Məcəlləsinin müvafiq  maddələri ilə ittiham elan edildiyi qeyd olunur. Təqsirləndirilən şəxs qismində cəlb olunmuş Zamirə Hacıyevanın istintaqdan gizləndiyi, bu üzdən onun barəsində həbs qətimkan tədbiri seçildiyi, axtarış elan edildiyi bildirilir.

“Hazırda təqsirləndirilən şəxslər və onların müdafiəçiləri iş materialları ilə tanış edilir və cinayət prosessual qanunvericiliyin tələblərinə müvafiq olaraq cinayət işi məhkəməyə göndərilmək ərəfəsindədir” - deyə nazirlik bildirir.

Nazirlik həmçinin qeyd edib ki, istintaq zamanı müəyyən edilən yeni xüsusatlar üzrə ayrıca cinayət işi açılıb. İstintaqın gəldiyi nəticələrə görə, ölkə daxilində və bir sıra xarici dövlətlərdə müxtəlif lahiyələrin həyata keçirilməsi adı altında 100-dən çox müəssisə və şirkət yaradılıb. “Azərbaycan Beynəlxalq Bankı” ASC-dən götürülmüş külli miqdarda pul vəsaitlərinin Həmin şirkətlər vasitəsilə mənimsənilməsinə şübhələr var.

C.Hacıyev ötən il dekabrın 5-də həbs edilib. O, Cinayət Məcəlləsinin iki maddəsi – 179.3.3 (mənimsəmə) və 308.2-ci (vəzifə səlahiyyətlərindən sui-istifadə) maddələri ilə ittiham olunur.

Vəkillərdən Əfqan Məmmədov ötən ayın əvvəlində C.Hacıyevin konkret 42 milyon manat mənimsəməkdə ittiham olunduğunu açıqlamışdı. Vəkil həmçinin demişdi ki, C.Hacıyev mənimsədiyi iddia olunan vəsaitə əvəz bankdakı 80 milyon manatlıq səhmlərindən imtina edib.

Bu yaxınlarda “Beynəlxalq Bank ” işinə görə həbs olunanlardan 10 nəfərdən çoxu azadlığa buraxılıb. Onlar bankdan götürdükləri kreditləri qaytarmamağa görə, saxlanmışdılar.

Beynəlxalq Bankla bağlı problemli kreditlərdən 400 milyon manatın qaytarıldığı bildirilir. Ancaq hökumət Beynəlxalq bankdan götürülüb qaytarılmayan kreditlərin həcmini tam açıqlamır.