Zeynallının işi üzrə məhkəmə prosesi süni olaraq uzadılır

Yanvarın 9-da saat 14.00-da Ağır Cinayətlərə dair İşlər üzrə Məhkəmədə Ramella Allahverdiyevanın sədrliyi ilə “Xural” qəzetinin baş redaktoru Əvəz Zeynallının işi üzrə növbəti məhkəmə prosesi keçiriləcək.

Əvəz Zeynallı keçmiş deputat Gülər Əhmədovanın guya Zeynallının ondan pul tələb etməsi haqqında saxta ittihamı ilə həbs edilib. Onun şikayəti əsasında 28 oktyabr 2011-ci ildə Baş Prokurorluq nəzdində Korrupsiyaya qarşı Mübarizə İdarəsi 311.3.3 (böyük ölçüdə rüşvət alma) və 311.3.4 (qorxutma yolu ilə rüşvət alma) maddəsi ilə cinayət işi açıb. Lakin hələ də başa çatmayan məhkəmə prosesində ittiham tərəfi Zeynallının təqsirini sübut edən dəlillər təqdim etməyib. 

İndi Əhmədova özü korrupsiya subyektinə çevrilib. O, hakim “Yeni Azərbaycan” Partiyasının sıralarından çıxarılıb və deputat səlahiyyətlərindən məhrum edilib. Baş Prokurorluq Beynəlxalq Universitetin keçmiş rektoru Elşad Abdullayevi qanunsuz yolla parlamentə keçirmək məqsədilə ondan böyük məbləğdə rüşvət alması ilə əlaqədar CM-in 178.3.2-ci (Fırıldaqçılıq) maddəsi ilə cinayət işi açıb. 

Məhkəmədə Zeynallı bildirib ki, Əhmədova Prezident Administrasiyasının rəhbəri Ramiz Mehdiyev və administrasiyanın İctimai-Siyasi şöbəsinin müdiri Əli Həsənov tərəfindən öyrədilərək onun yanına göndərilib. 

Beynəlxalq hüquq müdafiə təşkilatları Zeynallını vicdan məhbusu kimi qəbul ediblər, belə ki, redaktorun həbsinin əsl səbəbinin hakimiyyəti tənqid etməsi olduğunu hesab edirlər.

Zeynallının işi üzrə ilk məhkəmə iclası 14 may 2012-ci ildə keçirilib. Müdafiə tərəfin fikrincə, məhkəmə onun təqsirini sübuta yetirə bilmir və əsassız olaraq hökm çıxarılmasını gecikdirir. -0-