Azərbaycanla sərhəddə təxribat ola bilər? – İlham İsmayıl saat 16:00-da Çətin sualda

Yerli medianın yaydığı məlumata görə, fevralın 3-də Çexiya vətəndaşı Ermənistan tərəfdə minalanmış zonadan şərti sərhədi keçərək, Azərbaycan ərazisinə daxil olarkən saxlanılıb. Yerli media yazır ki, müvafiq məlumat Çexiyanın Bakıdakı konsulluğuna göndərilib. Faktla bağlı araşdırma aparılır və onun şəxsiyyəti müəyyənləşdirilir. Amma Azərbaycanın rəsmi qurumları və rəsmi Praqa yazılanlarla bağlı hər hansı bir açıqlama vermirlər.

Azərbaycan Dövlət Televiziyasının (AzTV) “Həftə” analitik-informasiya proqramında isə iddia olunub ki, Fransa Azərbaycana qarşı ildırımsürətli müharibə planı hazırlayıb. Verilişdə Fransa və Ermənistanın hazırladığı iddia olunan hücumun istiqaməti açıqlanıb: “Hücum qəfil olmalı və Cermuk istiqamətindən reallaşdırılması planlaşdırılıb”.

Aparıcı Rövşən Məmmədov qeyd edib ki, Avropa ölkələrinin agentləri sərhədlərimizi keçməyə çalışır: “Fransa Milli Jandarma İdarəsinin generallarından biri Ermənistan ərazisindən bizim sərhədlərimizə yaxınlaşaraq binoklla müşahidə aparıb.”  

Xatırladaq ki, fevralın 2-də Fransa Milli Jandarmeriyasının briqada generalı Uilyam De Meyer Avropa İttifaqının Ermənistandakı mülki missiyasının yerləşdiyi yerə baş çəkmişdi, orada sərhəddəki vəziyyətlə tanış olmuşdu.

Yeri gəlmişkən, fevralın 2-də ABŞ-ın Ermənistandakı səfirliyi bu ölkədəki vətəndaşlarına müraciət edib. Səfirlik onları Ermənistan-Azərbaycan sərhədinə səfər etməməyə çağırıb. ABŞ Səfirliyi əməkdaşlarına və onların ailələrinə aşağıdakı yerlərə hər hansı qeyri-vacib səyahəti qadağan sayıb. Səfirlik həmin ərazilərin adlarını da açıqlayıb:

“Vardenisin şərqindəki Geqarkunik bölgəsi, Gorusun şərqindəki Sünik və Qafandan cənubda Sünik rayonu”.

Bildirilir ki, Ararat rayonunun Yeraşx kəndi ilə səyahətə icazə verilir, amma həmin yerlərdə dayanmaq qadağandır.

Bu iddialar nə qədər doğru ola bilər? Azərbaycan-Ermənistan sərhəddində həqiqətənmi təxribatlar baş verə bilər?

Təhlükəsizlik məsələləri üzrə ekspert İlham İsmayıl Kamran Mahmudovun təqdimatında yayımlanan “Çətin sual” verilişində  bu iddialar haqqında danışır.