Əli Əliyevə yeni cəza. Siyasi qisas? – Elçin Rəhimzadə Çətin sual qarşısında

Bakı/23.11.22/Turan: Noyabrın 22-də Sabunçu Rayon Məhkəməsində Vətəndaş və İnkişaf Partiyasının sədri Əli Əliyevə hökm oxunub. Məhkəmənin qərarı ilə o 3 il 6 ay müddətinə azadlıqdan məhrum edilib.

Dövlət ittihamçısı Əliyevin 4 il müddətinə azadlıqdan məhrum edilməsini istəmişdi. O həmçinin yeni iş üzrə cəzanın (3 il 11 ay) əvvəlki cinayət işi üzrə cəzanın çəkilməmiş hissəsilə birləşdirilməsini təklif etmişdi.

Əli Əliyev bu dəfə Cinayət Məcəlləsinin 127.2.3-cü maddəsilə (xuliqanlıq niyyətilə sağlamlığa qəsdən zərər vurma) ittiham olunur. O, kamera yoldaşını döyməkdə təqsirli bilinir.

Əliyev ittihamları rədd edib və həbs cəzasının uzadılması üçün ona qarşı təxribat törədildiyini bildirib.

Xatırladaq ki, 2022-ci il yanvarın 13-də Bakının Yasamal Rayon Məhkəməsi Əli Əliyevi böhtan ittihamı ilə 5 ay müddətinə azadlıqdan məhrum etmişdi. Sərhəd xidmətinin polkovnik-leytenantı Emil Cəfərov ona qarşı xüsusi ittiham qaydasında şikayət vermişdi. Sərhəd xidmətinin digər zabiti Ramin Ədilov da Əliyevə qarşı analoji şikayətlə müraciət etmişdi. Bu şikayət əsasında Əliyev daha bir ay həbs cəzası almışdı.

Onların hər ikisi noyabrın 30-da Xızı rayonu ərazisində qəzaya uğrayan Mi-17 helikopterində sağ qalanlardır. İddiaya 9 dekabr 2021-ci il tarixində Əliyevin Osmanqızı TV Youtube- kanalına verdiyi müsahibə səbəb olub. Əliyev ehtimal edib ki, vertolyot xarici təsir nəticəsində qəzaya uğraya bilər, ona görə də Sərhəd Xidmətinin vertolyotuna hücum Azərbaycan sərhədinə hücum kimi qiymətləndirilməlidir.

Sonradan hakim Yeni Azərbaycan Partiyasının keçmiş funksioneri Ramiz Göyuşovun iddiası ilə Əliyevin cəzası 1 ilədək artırılıb. Avqustda Əli Əliyevə qarşı dördüncü cinayət işi açılıb.

Baş verənlərlə bağlı Bumeranq Medianın rəhbəri Elçin Rəhimzadə Kamran Mahmudovun təqdimatında yayımlanan “Çətin sual” verilişində danışır.