Fransa Azərbaycanda casus yerləşdirib? Məqsəd nə ola bilər? – İlham İsmayıl Çətin sualda

Bakı/10.01.24/Turan: Rəsmi Paris Azərbaycanın Fransa vətəndaşını qanunsuz və özbaşına saxladığını deyib və vətəndaşının dərhal azad edilməsini tələb edib.

Azərbaycan Xarici İşlər Nazirliyinin Mətbuat İdarəsinin rəisi Ayxan Hacızadə Martin Rayanın əsassız olaraq tutulması barədə Fransanın Avropa və Xarici İşlər Nazirliyinin iddialarını əsassız sayır:

"Bu əsassız bəyanat reallığın təhrif olunması, Azərbaycanın daxili işlərinə və qanuni təhqiqat prosesinə növbəti müdaxilə cəhdidir".

Azərbaycanın Fransadakı səfiri Leyla Abdullayeva casusluq əməlləri törətməkdə şübhəli bilinən Fransa vətəndaşının  həbs olunduğunu təsdiqləyib. Leyla Abdullayeva “France Presse”ə müsahibəsində bildirib ki, Martin Rayan casusluqda ittiham olunur.

Səfir əlavə edib ki, bu barədə Fransanın Bakıdakı səfirliyi məlumatlandırılıb.

Martin Rayan Bakıda bizneslə məşğul olan Fransa vətəndaşıdır, “Mercorama LC”nin baş direktorudur. O, ona qarşı irəli sürülən casusluq ittihamlarını qəti şəkildə rədd edir.

Vəkili Nizami Əliyev Turana Martin Rayanın  dekabrın 4-də həbs olunduğunu deyib. "Martin Rayan özünü təqsirli bilmir. Sadəcə olaraq, Fransa xüsusi xidmət orqanlarının əməkdaşları tərəfindən aldadılıb".

2023-cü ilin dekabrın 26-da Azərbaycan Xarici İşlər Nazirliyi Fransa səfirliyinin 2 əməkdaşını “persona-non-grata” (arzuolunmaz şəxs) elan edib.

Bir gün sonra, dekabrın 27-də Fransa Xarici İşlər Nazirliyi adekvat addım atıb.

Təhlükəsizlik məsələləri üzrə ekspert İlham İsmayıl Kamran Mahmudovun təqdimatında yayımlanan “Çətin sual” verilişində bu barədə danışır.