Ekvadorda silahlı qarşıdurma

Ekvador hakimiyyəti “Los Çoneros” cinayətkar qruplaşmasının liderinin həbsxanadan qaçmasından sonra təhlükəsizlik vəziyyətinin pisləşməsi ilə əlaqədar ölkədə daxili silahlı qarşıdurma rejimi tətbiq edib. Ölkə həbsxanalarında üsyanlar başlayıb, bütün ölkədə iğtişaşlar baş qaldırıb. Son məlumatlara görə, ən azı 13 nəfər artıq iğtişaşların qurbanı olub. Ekvador prezidenti Daniel Noboa həbsxanalarda asayişin bərqərar olması üçün ölkədə fövqəladə vəziyyət elan edib. Onun sözlərinə görə, hökumət “terrorçularla danışıqlar aparmayacaq” və “ekvadorlulara sülh qaytarana qədər sakitləşməyəcək”.

Dövlət başçısı 22 cinayətkar qrupun zərərsizləşdirilməsi barədə göstəriş verib. Ekvador silahlı qüvvələri cinayətkar dəstələri qanuni hərbi hədəf adlandırıb və parlament güc strukturlarına səlahiyyətdən sui-istifadəyə görə amnistiya vəd edib.

Qitə ölkələrinin, o cümlədən Argentina, Peru, Braziliya, Boliviya, Kolumbiya və Venesuela liderləri respublikanın hakimiyyət orqanlarına dəstək ifadə ediblər. Eyni zamanda, narkotik cinayətlərinə qarşı mübarizədə konsolidasiyaya çağırışlar edilib. İspaniya quldurların zorakılıq hərəkətlərini pisləyib.