İranla münasibət istiləşməyə başlayır? – Sədrəddin Soltan Çətin sual qarşısında

Bakı/21.11.22/Turan: İranın ali ruhani lideri Seyid Əli Xameneyinin beynəlxalq məsələlər üzrə baş müşaviri Əli Əkbər Vilayəti İranın heç vaxt Azərbaycan Respublikasına təcavüz etmək və onun nəzarəti altına almaq niyyətində olmadığını bəyan edib. Vilayəti “Təsnim” agentliyinin saytında dərc olunan məqaləsində Azərbaycan xalqının İran tarixindəki rolunu və ölkənin qorunmasında, İranın qüdrətinin və regional əhəmiyyətinin gücləndirilməsində addımlarını yüksək qiymətləndirib.

O, iki ölkə arasında siyasi və media gərginliyinə də toxunaraq, etnik mənsubiyyətindən asılı olmayaraq bütün iranlıların iranlı hesab edildiyini bir daha vurğulayıb.

“Bu gün demək lazımdır ki, hər bir azərbaycanlı iranlıdır, hər bir iranlı isə azərbaycanlıdır. Onlar hətta qeyri-İran pasportuna malik olsalar və ya İrandan kənarda yaşasalar da, bu, belədir” - deyə liderin müşaviri davam edib: “Mən özüm də azərbaycanlıyam”.

Vilayətinin bu açıqlamalarından sonra Azərbaycan tərəfi də öz mövqeyini açıqlayıb.  Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev APA-ya açıqlamasında bildirib ki, “Əli Əkbər Vilayətinin xalqlarımızın ortaq tarixi, dini, mədəni irsə və adət-ənənlərə malik olması və bütövlükdə Azərbaycan-İran əlaqələri barəsində səsləndirdiyi qeydlərini müsbət qiymətləndirir və təqdir edirik".

Hikmət Hacıyevin sözlərinə görə, İranla gərginliyin yaranmasının Azərbaycan təşəbbüskar olmayıb.

"Xüsusilə onu bildirmək istərdim ki, Azərbaycan sərhədləri yaxınlığında İran silahlı qüvvələrinin iki hərbi təlim keçirməsi ölkələrimiz arasında etimadın güclənməsinə xidmət etməyib, əksinə bu etimada mənfi təsir göstərib.

Azərbaycan bütün dövrlərdə qarşılıqlı hörmət və etimad əsasında İran ilə əlaqələrin inkişafında maraqlı olub və bu gün də bu belədir”, - deyə Hacıyev vurğulayıb.

Siyasi şərhçi Sədrəddin Soltan Kamran Mahmudovun təqdimatında yayımlanan “Çətin sual” verilişində bu barədə danışır.