NATO-nun baş katibi Yens Stoltenberq Bakıya niyə gəlib? - Cəsur Məmmədov Çətin sualda

NATO-nun baş katibi Yens Stoltenberq Cənubi Qafqaz ölkələrinə üçgünlük səfəri çərçivəsində bazar günü martın 17-də Bakıda olub və Prezident İlham Əliyevlə görüşüb. Görüşdə baş katib Azərbaycanın Alyans ilə uzunmüddətli əməkdaşlığını alqışlayıb, tərəfdaşlığın daha da möhkəmlənməsinə ümid etdiyini bildirib.

Prezident qeyd edib ki, Xarici İşlər nazirləri və sərhədlərin delimitasiyası ilə bağlı Baş nazirlərin müavinləri arasında keçirilmiş görüşlər məsələnin həlli üçün yaxşı imkanın olduğunu nümayiş etdirir:

“Biz sülhə heç vaxt olmadığımız qədər yaxınıq”.

“Bu gün isə hesab edirəm və ümidvaram ki, Azərbaycanın ərazi bütövlüyünün bərpası nəticəsində bu mövzuda nəhayət nəticə əldə ediləcək. Zənnimcə, bu, Cənubi Qafqazda çox ciddi dəyişiklik olacaq. Bu isə o deməkdir ki, burada çoxdandır gözlənilən sülh bərqərar olacaq”,- deyə Əliyev əlavə edib.

İlham Əliyev hazırda Ermənistanla sülh danışıqlarının fəal mərhələdə olduğunu bildirib:

“Sülh danışıqlarına başlamağın bizim təşəbbüsümüz olduğunu bir daha bildirmək istərdim. Bu günədək sülh sazişinin layihəsinə dair ermənistanlı həmkarlarla 7 dəfə şərhlərin mübadiləsi baş tutub”.

“Azərbaycan-NATO tərəfdaşlığının 30 ildən artıq davam edən uzun tarixi var”,- deyə Əliyev qeyd edib ki, bu, Azərbaycan üçün böyük təcrübə olub.

“Xəzər” Hərbi Tədqiqatlar İnstitutunun rəhbəri Cəsur Məmmədov Kamran Mahmudovun təqdimatında yayımlanan “Çətin sual” verilişində bu barədə danışır.