Rusiya və Qərbin Cənubi Qafqazda təsir uğrunda mübarizəsi və regionda vəziyyətin inkişafına dair proqnoz - postsovet məkanı üzrə ekspert Kirill Krivoşeevlə söhbət

O, Azərbaycan və Rusiyanın yaxınlaşdığını iddia edən bəzi ekspertlərin versiyası ilə razı deyil. Onun fikrincə, Moskvanın yaxın dostları onun birbaşa tərəfdarlarıdır. Bu, Belarus, Mərkəzi Asiyanın ən zəif ölkələri olan Tacikistan və Qırğızıstan kimi ölkələrdir. Postsovet məkanının nisbətən güclü ölkələri - Azərbaycan, Özbəkistan və Qazaxıstan isə Moskvadan daha az asılıdır və müəyyən şərtlərdə ona “yox” deyə bilirlər.

Ermənistanın 2020-ci il müharibəsi və 19-20 sentyabr 2023-cü il tarixlərində Qarabağda həyata keçirilən antiterror əməliyyatları zamanı Rusiyanın hərəkətlərinə reaksiyasına toxunan Krivoşeev deyib ki, bu, gözlənilən idi. Baxmayaraq ki, onun fikrincə, Rusiyanın laqeyd münasibəti Azərbaycanın Moskvanın Cənubi Qafqazda hər hansı qətiyyətli addım ata bilməyəcəyi bir anda zərbə endirməsi ilə bağlı idi.

“Məhz bu anda Azərbaycan Qarabağ məsələsini birdəfəlik bağladı”, deyə ekspert bildirib.

Krivoşeev Azərbaycanın Ermənistana tammiqyaslı hücumu mümkünlüyünə şübhə ilə yanaşır. O, hesab edir ki, sərhəddə daha bir silahlı toqquşma olacaq. Yəqin ki, anklavlar uğrunda (Ermənistan ərazisində Azərbaycan eksklavları - red.), sərhədlərin delimitasiyası və demarkasiyası ilə əlaqədar hansısa döyüşlər olacaq. Onun fikrincə, “Azərbaycan hücum etsə, özünü ciddi zərbə altına qoyar. Bundan başqa, bu, Qərbin gözündə çox xoşagəlməz görünəcək. Sanksiyalara məruz qalmaq və qəbul edilməyənlərdən olmaq riski var”.

Krivoşeev əmindir ki, Ermənistan prinsipcə Zəngəzur dəhlizinin çəkilməsinə yol vermək istəmir və buna görə bütün mümkün vasitələrlə buna müqavimət göstərir. Deyir ki, rus sərhədçilərini sevmir, marşrutu bəyənmir və nə gəldi, deyəcək. O, Azərbaycan yüklərinin və ya əhalisinin onun ərazisindən keçməsini istəmir, bunda təhlükə görür.

“Zəngəzur dəhlizi Azərbaycanın gələcəkdə iddia irəli sürə bilməyəcəyi ərazilərdən keçir. Bundan başqa, bu, İranla sərhədə yaxın strateji yerdir”, deyə o bildirib.

Ermənistanın təklif etdiyi, mahiyyətcə regionda kommunikasiyaların açılması layihəsinin erməni versiyası olan “Sülh qovşağı” layihəsinə gəlincə, ekspertin sözlərinə görə, bu, yalnız Yerevanın ümumiyyətlə kommunikasiyalara qarşı olduğunu etiraf etməkdən yayınmaq üçün dövriyyəyə buraxılmış bir uydurmadır.

Ermənistanın Fransa və Hindistandan silah almasına toxunan Krivoşeev deyib ki, Yerevan revanş üçün deyil, yalnız öz ərazilərinə hücumun qarşısını almaq üçün silahlanır. “Yaxın on ildə onun başqa bir şeyə sadəcə olaraq gücü çatmaz”, ekspert belə hesab edir.

Ermənistan cəmiyyətinin sülhə hazır olmasına gəlincə, ekspert belə deyib: “Yaxın gələcəkdə atəş açılmasa, sərhəd bağlı olsa, lakin diplomatik münasibətlər olsa yaxşı olardı. Bu, indikindən daha yaxşıdır. Çünki yavaş-yavaş gedən silahlı münaqişə davam edir”.