Yolları qalmayan Qarabağ erməniləri Bakıya danışıq üçün gələcəkmi? – Oktay Qasımov Çətin sualda

Bakı/28.03.23/Turan:  Erməni tərəfinin yaydığı məlumata görə, Azərbaycan qüvvələrinin ötən şənbə günü – martın 25-də irəliləməsi nəticəsində Xankəndi ilə Turşsu arasındakı torpaq yol tamamilə bağlanıb.

AzadlıqRadiosunun Erməni xidməti - Azatutyun Qarabağ separatçılarına istinadən yazır ki, onlar bu yoldan Xankəndi və Şuşa rayonunun dörd “kənd icması” arasında əlaqə üçün istifadə edirdilər.

Separatçı liderlərdən Artur Arutyunyan Azatutyuna deyib ki, bu yolla artıq heç bir hərəkət mümkün deyil, çünki Azərbaycan hərbçiləri tutduqları yüksəklikdən yola tamamilə nəzarət edirlər.

Bu arada ötən gün Azərbaycan hakimiyyəti Qarabağın erməni icmasının nümayəndələrini reinteqrasiya məsələlərini müzakirə etmək üçün bir daha görüşə dəvət edib.

"Azərbaycan Respublikası Prezidentinin Administrasiyası martın 1-də Xocalı şəhərində keçirilmiş görüşün və martın 13-də təqdim edilmiş dəvətin davamı olaraq Qarabağın erməni ictimaiyyətinin nümayəndələrini reinteqrasiya, həmçinin Qarabağda infrastruktur layihələrinin icrası məsələlərinin müzakirəsi məqsədilə aprel ayının birinci həftəsi Bakı şəhərində görüşün keçirilməsini bir daha təklif edir", deyə Prezident Administrasiyasının rəsmi məlumatında bildirilir.

Siyasi şərhçi Oktay Qasımov Kamran Mahmudovun təqdimatında yayımlanan “Çətin sual” verilişində baş verənlər barədə danışır.