Bakı/28.03.23/Turan: İstanbulda Azərbaycan ədəbiyyatının şərəfli qələm sahibi Əhməd Cavadın şeirlərindən ibarət kitabı çapdan çıxıb. `Nestor` nəşriyyatının çap etdiyi “Çırpınırdın Karadeniz” adlı 380 səhifəlik kitabı Türkcəyə Turan Agentliyinin Türkiyə təmsilçisi, filologiya elmləri namizədi Mayis Əlizadə tərcümə edib.
Bundan əvvəl Əhməd Cavadın təxminən 30 şeirinin daxil olduğu kitabı 1990-cı ildə çap edilib. ”Çırpınırdın Karadeniz” kitabına qısa ön söz yazan `Nestor` nəşriyyatının sahibi Taleh Bağıyev diqqəti Əhməd Cavadın anadan olmasının 120 və 130-cu illərinin qeyd edilməsində Azərbaycan prezidenti İlham Əliyevin imzaladığı qərarların əhəmiyyətinə cəlb edərək kitabın çapa hazırlanmasında zəhməti olan şəxslərə minnətdarlığını bildirib.
”Çırpınırdın Karadeniz” kitabına “Bir kalem sahibi ve kişilik olarak Ahmet Cevat fenomeni” başlıqlı elmi ön söz yazan Bakı Dövlət Universitetinin müəllimi, professor Vaqif Sultanlı Türkiyə oxucusunun bu kitab sayəsində Əhməd Cavadı daha yaxından tanıyacağını ifadə edib.
”Çırpınırdın Karadeniz”in İstanbulda işıq üzü görməsi münasibətiylə Turan İnformasiya Agentliyinə açıqlama verən kitabın tərcüməçisi Mayis Əlizadə deyib: ”Azərbaycan coğrafiyasındakı Türk etnik varlığının əsas simvollarından biri Əhməd Cavaddır. Hüseyn Cavidin, Salman Mümtazın, Əhməd Cavadın, Mikayıl Müşfiqin yaşadığı faciələr birbaşa millətin bağrına endirilmiş zərbələr idi ki, o zərbələrdən millət hələ də özünə gələ bilmir. Təəssüf ki, Əhməd Cavadı bu günə qədər Türkiyənin təkcə milliyyətçi təbəqəsi `Çırpınırdın Qara dəniz` şeirinin müəllifi kimi tanıyıb. Halbuki Əhməd Cavad sözün ən geniş mənasında şairdir və Türk poeziyasının son 100 ildəki ən önəmli qələm sahibləriylə eyni sırada durmağı haqq edir. Tərcümə etmək şərəfi mənə nəsib olmuş “Çırpınırdın Karadeniz” kitabı Türkiyədə bu sahədəki boşluğu doldurmağa xidmət edəcək, buna inanıram”.
2020-ci ilin axırında yaradılan `Nestor` nəşriyyatı Azərbaycan ədəbiyyatının və fikir-düşüncə tarixinin mühüm qələm sahiblərinin əsərlərini Türkcə çap etməyi qarşısına məqsəd qoyub. Nəşriyyat indiyə qədər Ahmet Ağaoğlunun, Məhəmməd Əmin Rəsulzadənin, Mirzə Bala Məmmədzadənin, Rüstəm İbrahimbəyovun(nəsr əsələri) və b. müəlliflərin əsərlərini oxuculara təqdim edib.
Mədəniyyət
-
Mexikoda keçirilən möhtəşəm mərasimdə Danimarkanın kiçik Dunstal şəhərindən olan 21 yaşlı Victoria Kjær Teilvig “Miss Universe” yarışmasının qalibi elan olundu. Bu, Danimarkadan olan iştirakçının bu mötəbər titulu qazandığı ilk haldır.
-
İqlim dəyişikliyinin təsirləri getdikcə artan bir dünyada, incəsənət gözlənilməz, lakin güclü bir platforma olaraq ortaya çıxaraq ekoloji məsuliyyət barədə məlumatlandırma və müzakirələrə təkan verir. Bu təşəbbüslərdən biri də hazırda Goethe-Institutun dəstəyi ilə Kapellhausda nümayiş olunan “Başqa bir iqlim növü” adlı sərgidir. Bu sərginin zamanlaması təsadüfi deyil və 11-22 noyabr tarixlərində Bakıda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransı — COP29 ilə üst-üstə düşür. Sərgi, yerli və beynəlxalq perspektivləri birləşdirərək tamaşaçılara vacib ekoloji məsələlər barədə düşünməyi təklif edir.
-
Şəhərin hərarəti və müasir həyatın səs-küyü arasında, təbiətin də bir səsi olduğunu tez-tez unuduruq. Lakin rəssam Elnarə Nəsirli, "Meşənin Pıçıltısı - Səsin Sehri" adlı son sərgisi ilə təbiətin nəbzini və mesajını bizə xatırlatmaq istəyir. Hazırda "Gazelli Art House"-da nümayiş olunan bu multidisiplinar sərgi izləyiciləri meşənin ürəyinə daha yaxınlaşdırır; hər bir yarpaq xışıltısı, hər bir pıçıltı həyatla dolu görünür.
-
Dünya, təcili ekoloji çağırışlarla üzləşdiyi bir dövrdə, təbii resursların qorunması artıq ölkələri birləşdirən ortaq dəyərə çevrilib. Əvvəllər sadəcə müzakirə mövzusu olan ekoloji mühafizə indi demək olar ki, hər qlobal tədbirin diqqət mərkəzindədir.
Rəy yaz