Avropa Rusiya ilə genişmiqyaslı müharibə təhlükəsi artdıqca hərbi çağırışa keçir

CNN:  Rusiya Ukraynaya genişmiqyaslı işğala başlamazdan əvvəl Kiyev də daxil olmaqla bir çoxları böyük müharibənin Avropaya qayıdacağına şübhə ilə yanaşırdılar. İki ildən çox vaxt keçib və bir vaxtlar ağlasığmaz olan hərbi xidmətə çağırış məsələsi növbəti dəyişikliyə məruz qalır.

Bir sıra Avropa ölkələri Moskvadan artan təhlükə fonunda icbari hərbi xidməti yenidən tətbiq edib və ya genişləndiriblər.

Bu, müdafiənin gücləndirilməsinə yönəlmiş tədbirlər kompleksinin bir hissəsidir və ehtimal ki, daha da genişləndiriləcək.

“Biz başa düşürük ki, müharibə üçün səfərbərliyimizi və hərbi texnika istehsal etməyimizi, kadrları işə götürməyi və öyrətməyimizi tənzimləməli ola bilərik”, - deyə Xarici Siyasət Tədqiqatları İnstitutunun Avrasiya tədqiqatları üzrə direktoru, 30 il ABŞ ordusunda zabit kimi xidmət etmiş Robert Hamilton bildirib.

“Təəssüf ki, biz 2024-cü ildəyik və potensial olaraq müharibənin ətçəkən maşınına atılacaq milyonlarla insanı necə səfərbər edəcəyimizlə bağlı suallarla üzləşirik, amma Rusiyanın bizi gətirdiyi yer budur” deyə o qeyd edib.

Rusiya prezidenti Vladimir Putinin “Sovet imperiyasını yenidən qurmaq” məqsədinə çatmaq üçün Ukraynada “nəhayət, açıq münaqişəyə əl atmasından” sonra Avropada genişmiqyaslı müharibə riskləri artıb”, - deyə Avropada NATO qüvvələrinin Ali Baş Komandan vəzifəsində çalışmış general Uesli Klark (ehtiyatdadır) bildirib.

Kosovo müharibəsi zamanı NATO qüvvələrinə rəhbərlik edən Klark, "İndi Avropada bir daha görəcəyimizi düşünmədiyimiz bir müharibə var" deyib. "Bunun yeni Soyuq Müharibə və ya yaxınlaşmaqda olan qaynar müharibə olduğu bəlli deyil," deyə o davam edib, "amma bu, NATO-nun müdafiə imkanlarımızı yenidən qurmalı olduğumuza dair qaçılmaz xəbərdarlığıdır".

Onun sözlərinə görə, bu səylərə hərbi çağırış da daxildir.